الماتىدا ينكليۋزيۆتى ورتا قۇرۋعا جانە ەرەكشە قاجەتتىلىكتەرى بار جاستاردى قولداۋعا باعىتتالعان «ءاربىر ادام ماڭىزدى» جوباسىن ىسكە اسىرۋ جالعاسۋدا.
بۇل تۋرالى الماتى قالاسى جاستار ساياساتى باسقارماسى باسشىسىنىڭ ورىنباسارى الماز كەڭەسباي وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا مالىمدەدى، دەپ حابارلايدى aqshamnews.kz.
سپيكەردىڭ ايتۋىنشا، بۇل جوبانى مەملەكەتتىك قولداۋ شەشۋشى ءرول اتقارادى:
«ينكليۋزيۆتى باعدارلامالاردى جۇزەگە اسىرۋ – بۇل تەك الەۋمەتتىك ادىلەتتىلىك ماسەلەسى عانا ەمەس، سونىمەن قاتار الماتىنىڭ تۇراقتى دامۋىنا باعىتتالعان مەملەكەتتىك ساياساتتىڭ ماڭىزدى بولىگى».
ول جوبا ورنىقتى ينستيتۋسيونالدىق جانە قارجىلىق قامتاماسىز ەتۋ نەگىزىندە ىسكە اسىرىلىپ جاتقانىن اتاپ ءوتتى: «مەملەكەتتىك رەسۋرستار ماتەريالدىق-تەحنيكالىق بازانى نىعايتۋعا باعىتتالۋدا. ونسىز بارلىق جاستاردىڭ ءوزىن ءوزى جۇزەگە اسىرۋ مۇمكىندىكتەرىنە تەڭ قول جەتكىزۋىن قامتاماسىز ەتۋ مۇمكىن ەمەس».
الەۋمەتتىك ينتەگراسياعا ەرەكشە نازار اۋدارىلادى: ەرەكشە قاجەتتىلىكتەرى بار جاستاردى قوعامدىق ومىرگە تارتۋ الەۋمەتتىك شيەلەنىس ءقاۋپىن ازايتادى.
سونداي-اق، جوبانىڭ بارىسىنا تۇراقتى مونيتورينگ جۇرگىزىلەدى:
«ءبىز تيىمدىلىكتى ۇنەمى قاداعالاپ وتىرامىز جانە قاجەت بولعان جاعدايدا باعدارلاما اعىمداعى قاجەتتىلىكتەرگە سايكەس كەلەتىندەي وزگەرىستەر ەنگىزەمىز»، - دەپ تولىقتىردى الماز كەڭەسباي.
«جوبانىڭ ماڭىزدى بولىگى – بارلىق دەڭگەيدەگى ۇيىمدارمەن ءوزارا ءىس-قيمىل: جەكەمەنشىك سەكتوردان باستاپ، ءبىلىم بەرۋ مەكەمەلەرى مەن ۇكىمەتتىك ەمەس ۇيىمدارعا دەيىن. «ءبىزدىڭ كوزقاراس – بۇل ءبىر رەتتىك باستاما ەمەس، الماتىدا ينكليۋزيۆتى قوعام قۇرۋ ستراتەگياسىنىڭ ءبىر بولىگى»، – دەپ تۇيىندەدى ول.