الماتىدا ەرەكشە قاجەتتىلىگى بار تۇرعىندار قالا باسشىسى ەربولات دوسايەۆتىڭ تاپسىرماسى شەڭبەرىندە بىلىكتىلىگىن ارتتىرىپ، ەڭبەك ۇتقىرلىعى ورتالىعى ارقىلى وقۋدان وتۋگە مۇمكىندىك الادى.
سونداي-اق ولارعا «Ten Qogam» ورتالىقتارى ارقىلى كاسىپتىك تەراپيا مەن كاسىبي داعدىلاردى دامىتۋ بويىنشا قىزمەتتەر قولجەتىمدى بولادى، دەپ حابارلايدى Almaty-akshamy.kz
بۇل تۋرالى الماتى قالاسى اكىمىنىڭ ورىنباسارى اسەم ءنۇسىپوۆا الماتى قالاسىنىڭ ينكليۋزيۆتى ورتانى دامىتۋ جونىندەگى كەڭەستىڭ ءبىرىنشى وتىرىسىندا حابارلادى.
«2023 جىلى ەڭبەك ۇتقىرلىعى ورتالىعىنا ەرەكشە قاجەتتىلىگى بار 2860 ازامات جۇگىنىپ، 1965 ادام جۇمىسپەن قامتىلدى. بۇل رەتتە 244 ادام تۇراقتى جۇمىس ورىندارىنا، 502 ادام الەۋمەتتىك جۇمىس ورىندارىنا، 661 ادام «باستاۋ بيزنەس» باعدارلاماسى بويىنشا وقۋعا جىبەرىلدى»، — دەپ اتاپ ءوتتى اسەم ءنۇسىپوۆا.
ونىڭ ايتۋىنشا، بيىل جىل باسىنان بەرى ەڭبەك ۇتقىرلىعى ورتالىعىنا ەرەكشە قاجەتتىلىگى بار 993 ازامات جۇگىنگەن. 533 ادام جۇمىسپەن قامتۋ شارالارىمەن قامتىلسا، ال 2024 جىلدىڭ سوڭىنا دەيىن جۇمىسپەن قامتۋ شارالارىمەن كەمىندە 2،2 مىڭ ادامدى قامتۋ جوسپاردا بار.
«ءبىزدىڭ باستى مىندەتىمىز – ازاماتتاردىڭ ءوزىن-وزى تانۋى، ەڭبەگى ءۇشىن ماتەريالدىق سىياقى الۋى ءۇشىن ىنتالاندىرۋلار جاساۋ جانە، تيىسىنشە، ولاردىڭ ءومىر ءسۇرۋ ساپاسىن ارتتىرۋ. بۇل جالاقىنىڭ كەمىندە 70%-ى سۋبسيديالاۋ ارقىلى، سونداي-اق جۇمىس بەرۋشىلەردىڭ ارنايى جۇمىس ورىندارىن جابدىقتاۋعا ارنالعان جابدىقتاردى ساتىپ الۋعا جانە ورناتۋعا جۇمساعان شىعىندارىن وتەۋ ارقىلى جۇزەگە اسىرىلادى»، — دەدى الماتى قالاسى اكىمىنىڭ ورىنباسارى.
ايتا كەتەيىك، ەڭبەك ۇتقىرلىعى ورتالىعى ارنايى جۇمىس ورىندارىن جابدىقتاۋعا ارنالعان جابدىقتاردى ساتىپ الۋ جانە ورناتۋ شىعىندارىن وتەۋدى جۇزەگە اسىرادى. بۇل جۇمىس بەرۋشىلەرگە ەرەكشە قاجەتتىلىگى بار ادامداردى جۇمىسقا جالداۋعا كوبىرەك مۇمكىندىك بەرەدى.