الماتىلىق دامير ءابدىعاني قۇمىرسقا وسىرەدى.
ونىڭ اسىراعان ەڭبەكقور جاندىكتەرىنىڭ اراسىندا ەلدەگىدەن بولەك ەكزوتيكالىق تۇرلەرى دە بار. ءبىر قاراعان ادامعا قۇمىرسقا ءوسىرۋ وڭاي ءىس كورىنگەنىمەن، ولاردىڭ بابىن كەلتىرۋدىڭ وزىندىك قىر-سىرى بار. بۇل ىسكە جاس جەتكىنشەك 12 جاسىنان باستاپ دەن قويعان، دەپ حابارلايدى Almaty-akshamy.kz.
ەرەكشە حوببي يەسى وسىنداي ىسپەن اينالىسقانىنا قاراعاندا بولاشاعىن عىلىممەن بايلانىستىراتىن شىعار دەسەك، ول مۋزىكا سالاسىن مەڭگەرىپ ءجۇر ەكەن. 18 جاستاعى دامير احمەت جۇبانوۆ اتىنداعى مۋزىكالىق مەكتەپتەن بيىل تۇلەپ ۇشقالى وتىر. ءتىپتى بولاشاق ماماندىعىن دا تاڭداپ قويىپتى، مۋزىكالىق باعىتتا دىبىس رەجيسسەرى بولعىسى كەلەدى ەكەن. دەگەنمەن، بۇل قالاۋى ونىڭ قۇمىرسقا ءوسىرىپ، ءتىپتى ودان پايدا تابۋىنا كەدەرگى ەمەس.
باستاپقىدا بالاسىنىڭ قۇمىرسقا ءوسىرۋىن اتا-اناسى قولداي قويماعان. دەگەنمەن ۋاقىت وتە كەلە، بالاسىنىڭ ىزدەنىسى مەن قىزىعۋشىلىعىن كورىپ، ويلارىن وزگەرتكەن. ۇلدارىنا اقىل-كەڭەسىن بەرە وتىرىپ، سۇيىكتى ىسىمەن اينالىسۋى ءۇشىن جاعداي دا جاساپ بەرگەن. اناسى راۋشان انۋاربەكوۆا ءوزىنىڭ شاعىن تىگىن سەحىنان بالاسىنىڭ قۇمىرسقالاردى كۇتىپ-باپتاۋى ءۇشىن ءبىر بۇرىشىن جاساقتاپ بەرگەن. اتا-اناسى بالاسىنا بۇل ءىستىڭ جاي عانا حوببي ەمەس، تابىس اكەلۋى كەرەك دەگەن باعىت-باعدار بەرگەن ەكەن.
«ءاربىر ءحوببيدى بيزنەسكە اينالدىرۋ كەرەك. ول تەك قانا حوببي بولماۋى كەرەك. ول ساعان پايدا اكەلۋى كەرەك. ول ادامنىڭ سوعان جۇمساعان سونشا ۋاقىتىن اقتاۋى كەرەك. سونىڭ اقىسى بولۋى كەرەك دەگەن سياقتى اقىل-كەڭەس بەرىپ وتىردىق بالامىزعا»، - دەيدى اناسى.
وسىلايشا بالاسىنا قوسىمشا تابىس كوزىن تابۋدىڭ جولىن كورسەتىپ بەرگەن. بۇگىندە سۇيىكتى حوببيىنەن دامير قوسىمشا تابىس كوزىن تاۋىپ وتىر. ءتىپتى قۇمىرسقا ساتىپ، اتا-اناسىنا دا قارجىلاي كومەك كورسەتكەن كەزدەرى بولعان. باستاپقىدا عالامتوردان كورگەن جاي قىزىعۋشىلىقتان باستالعان بۇل ءىسىن ول الداعى ۋاقىتتا دا دامىتا بەرمەك نيەتتە. ەمدىك قاسيەتى بار قۇمىرسقادا الىناتىن قىشقىلعا شەتەل تاراپىنان سۇرانىس كوپ ەكەن.
«قۇمىرسقالاردى ءارتۇرلى ەلدەردەن الامىن. قىتايدان، اۆستراليادان، ەۆروپادان، جانە ولاردى كوبەيتىپ، قايتادان ەۋروپاعا، رەسەيگە ساتامىن. سەبەبى ول - جاقسى تابىس كوزى. ءبىر دانا قۇمىرسقانى مىڭ دوللارعا ساتقان كەزدەرىم دە بولدى»، - دەيدى دامير ءابدىعاني.
قۇمىرسقا ساتىپ الاتىن شەتەلدىكتەر ونى كوبىنە دارى-دارمەك شىعاراتىن زاۋىتتارعا وتكىزەدى. ەرەكشە كاسىپتى قولعا العان ءداميردىڭ جانۇياسى ەلىمىزدە سىرتتان اكەلىنەتىن وسىنداي جاندىكتەرگە سەرتيفيكات الۋ جاعى جولعا قويىلماعانىن ايتادى. وسى جاعىنان ەلدە زاڭداستىرۋ جايى قولعا الىنسا دەگەن تىلەكتەرىن ايتتى.
قالاۋىن تاپسا، قار جانار. جاي عانا قىزىعۋشىلىقتان باستالعان ءداميردىڭ بۇگىندە الەۋمەتتىك پاراقشاسىندا ودان اقىل-كەڭەس سۇرايتىن ءوزى قاتارلاس جاستار، ءتىپتى ميرمەكولوگياعا قىزىعاتىن ەرەسەك ادامدار دا بار ەكەن. بۇل ءداميردىڭ كوپ ىزدەنۋىنىڭ ارقاسىندا تاجىريبەسى قالىپتاسىپ قالعان كاسىبي مامانعا اينالعانىن اڭعارتادى. جاس تا بولسا، ىزدەنىستىڭ ارقاسىندا تابىسقا شىققان جاستىڭ ءىسى كوپكە ۇلگى.