جەكە ينۆەستور ەرەكشە ءبىلىم بەرۋ قاجەتتىلىكتەرى بار بالالارعا ارنالعان كوللەدج عيماراتىن سالدى
الماتى اكىمى ەربولات دوسايەۆ «الماتى مەملەكەتتىك تەحنولوگيالار جانە فلوريستيكا كوللەدجىندە» بولدى، قالا باسشىسىنا جاڭا وقۋ كورپۋسىن كورسەتتى، دەپ حابارلايدى almaty-akshamy.kz
وتكەن عاسىردىڭ 40-جىلدارىندا سالىنعان اپاتتى عيماراتتىڭ ورنىنا تۇرعىزىلعان جاڭا عيمارات ينكليۋزيۆتى ءبىلىم بەرۋ ءۇشىن قاجەتتى بارلىق زاتتارمەن جابدىقتالعان، «التىن ساپا ALM» ج ش س جەكە ينۆەستورىنىڭ اقشاسىنا 900 ملن تەڭگەدەن استام سوماعا سالىنعان.
بۇگىندە كوللەدجدە ءتۇرلى ماماندىقتار بويىنشا 893 ستۋدەنت وقيدى، ونىڭ ىشىندە 195 ستۋدەنت ەرەكشە ءبىلىم بەرۋدى قاجەت ەتەتىندەر. ەندى ستۋدەنتتەر جاڭا تەحنولوگيالار بويىنشا سالىنعان بىرەگەي وقۋ كابينەتتەرىندە ءبىلىم الادى. جاڭا عيماراتتا شەبەرحانالار، اكت جانە ترەناجەر زالدارى، مۇگەدەكتەرگە ارنالعان سانيتارلىق توراپ، كوتەرگىش، كيىم اۋىستىراتىن بولمەلەر بار.
كوللەدج يننوۆاسيالىق تەحنولوگيالارمەن جانە وقىتۋدىڭ وزىق ادىستەرىمەن جابدىقتالعان، بۇل ەستۋ قابىلەتى شەكتەۋلى ستۋدەنتتەرگە ەڭبەك نارىعىندا سۇرانىسقا يە ماماندىقتاردى الۋعا مۇمكىندىك بەرەدى.
كوللەدجدىڭ نەگىزگى مىندەتتەرىنىڭ بىرى-مۇمكىندىگى شەكتەۋلى ستۋدەنتتەرگە الەۋمەتتىك كومەك كورسەتۋ، ساپالى ءبىلىم مەن كاسىبي دايارلىققا جاعداي جاساۋ.
ستۋدەنتتەردىڭ كەلەسى ماماندىقتار بويىنشا ءبىلىم الۋلارىنا بولادى: جيھاز ءوندىرىسى، تىگىن ءوندىرىسى جانە كيىمدى مودەلدەۋ، اياق كيىم ءىسى، اۆتوموبيل جوندەۋ سلەسارى، كومپيۋتەرلىك اپپاراتتىق وپەراتور، گۇل ءوسىرۋشى - فلوريست.
وقۋ ورنىن ارالاعان ەربولات دوسايەۆ وقۋ پروسەسىنىڭ بارىسىمەن تانىستى. قالا باسشىسى ينكليۋزيۆتى قالانىڭ قولجەتىمدى جانە ساپالى الەۋمەتتىك ينفراقۇرىلىمى بار تەڭ مۇمكىندىكتەر قاعيداتتارىن ەنگىزۋ الماتى اكىمدىگى جۇمىسىنىڭ باستى مىندەتى بولىپ تابىلاتىنىن اتاپ ءوتتى.