مەگاپوليستە حالىقارالىق مۇگەدەكتەر كۇنىنە وراي «جۇرەكتەن جۇرەككە» اتتى اۋقىمدى قالالىق ينكليۋزيۆتى شىعارماشىلىق فەستيۆال ءوتتى. ەرەكشە ءبىلىم بەرۋ قاجەتتىلىگى بار بالالاردى، جاستاردى جانە مۇمكىندىگى شەكتەۋلى جانداردى قولداۋعا باعىتتالعان بۇل باستاما مادەني شارادان گورى، الماتىنىڭ تەڭدىك پەن ينكليۋزيا قۇندىلىقتارىن رەسمي تۇردە ايقىندايتىن قوعامدىق مانيفەستكە اينالدى.
فەستيۆال قوعامدى بىرىكتىرەتىن اشىق الاڭ رەتىندە ۇيىمداستىرىلدى. مۇندا ءار بالا مەن جاس ءوز قابىلەتىن ەركىن كورسەتىپ، تالانتىن تانىتۋعا مۇمكىندىك الدى. شارانىڭ يدەياسى مەن فورماتى قازاقستان رەسپۋبليكاسىنىڭ كونستيتۋسياسىنا، «بالانىڭ قۇقىقتارى تۋرالى» جانە «مۇگەدەكتەردى الەۋمەتتىك قورعاۋ تۋرالى» زاڭدارعا تولىق سايكەس ازىرلەنگەن. ۇيىمداستىرۋشىلاردىڭ ايتۋىنشا، باستى ماقسات – الماتىنى ينكليۋزيۆتى مادەنيەتتىڭ ورتالىعىنا اينالدىرۋ.
فەستيۆالدىڭ فيلوسوفياسى قاراپايىم ءارى تەرەڭ: «ءار ادام – بىرەگەي. ءار ادام – تەڭ». بۇل – اياۋشىلىق ەمەس، قابىلداۋ مەن قولداۋعا نەگىزدەلگەن كوزقاراس. «جۇرەكتەن جۇرەككە» ارقىلى قالا ينكليۋزيانى الەۋمەتتىك ساياساتتىڭ ءبىر باعىتى عانا ەمەس، مادەني كودتىڭ اجىراماس بولىگى رەتىندە قابىلداۋعا قادام جاسادى. وسىلايشا الماتى ورتالىق ازياداعى ەڭ ءىرى ينكليۋزيۆتى مادەني باستامالاردىڭ ءبىرىن جۇزەگە اسىردى.
ءىس-شارانى الماتى قالاسىنىڭ اكىمدىگى مەن قالالىق جۇمىسپەن قامتۋ جانە الەۋمەتتىك باعدارلامالار باسقارماسى، سونداي-اق «ەرەكشە بالالاردىڭ اتا-انالار وداعى» رەسپۋبليكالىق قوعامدىق بىرلەستىگى بىرلەسىپ ۇيىمداستىردى. فەستيۆالگە دەمەۋشىلەر، كاسىپكەرلەر، بلوگەرلەر جانە قوعام بەلسەندىلەرى دە قولداۋ كورسەتتى.
«ەرەكشە بالالاردىڭ اتا-انالار وداعى» رقب باسشىسى، ەرەكشە بالانىڭ اناسى راۋان ساعادييەۆا فەستيۆالدىڭ ءمانىن بىلاي ءتۇسىندىردى:
«ءبىزدىڭ ماقسات – بالالاردى دياگنوزىنا نەمەسە جاسىنا قاراي بولمەي، بارلىعىنا تەڭ مۇمكىندىك بەرۋ. ءبىز ينكليۋزيانى ءبىلىم، دەنساۋلىق، الەۋمەتتىك قولداۋ، پسيحولوگيالىق جانە قۇقىقتىق كومەك ارقىلى دامىتامىز. بۇل فەستيۆال ارقىلى قوعامعا ءبىر عانا ويدى جەتكىزگىمىز كەلەدى: ءبىزدىڭ بالالار ادەمى، تالانتتى، مۇگەدەكتىك – قورقىنىشتى نارسە ەمەس. ءار بالانىڭ ارتىندا جۇرەك، جان، اتا-انا تۇر. ءبىزدى بولەكتەمەي، قوسىڭىزدار»، – دەدى ول.
الماتىدا العاش رەت وتكەن فەستيۆالگە 25 ءوتىنىم ءتۇسىپ، دەنساۋلىق جاعدايىنا بايلانىستى 17 قاتىسۋشى ونەر كورسەتتى. ۇيىمداستىرۋشىلاردىڭ شەشىمىمەن بۇل جولى بارلىق قاتىسۋشى جەڭىمپاز دەپ تانىلىپ، سىياقىلار تابىستالدى. الداعى جىلدان باستاپ فەستيۆالدى رەسپۋبليكالىق دەڭگەيگە شىعارۋ جوسپارلانىپ وتىر.
فەستيۆالگە قاتىسۋشىلاردىڭ ءبىرى، ءانشى ءارى اقىن اسىلبەك قۋانىشقالييەۆ شارانىڭ اتموسفەراسىنا جوعارى باعا بەردى.
«بۇگىنگى فەستيۆالگە قاتىسقان ءار جان – جەڭىمپاز. الماتى قالاسىنا قونىس اۋدارعاننان بەرى بايقاعانىم، بۇل قالادا مۇمكىندىگى شەكتەۋلى جاندارعا ەرەكشە كوڭىل بولىنەدى. قولداۋ ناقتى ىسپەن دالەلدەنىپ وتىر. وسىنداي الاڭدار بىزگە ومىرگە دەگەن قۇشتارلىق پەن سەنىم سىيلايدى»، – دەدى ول.
«جۇرەكتەن جۇرەككە» فەستيۆالى الماتىدا ينكليۋزيانىڭ تەك ۇران ەمەس، ناقتى ارەكەت ەكەنىن كورسەتتى. بۇل – تالانتتى تانۋ، تەڭ مۇمكىندىكتى مويىنداۋ جانە جۇرەكتەن جۇرەككە جول تاباتىن مادەني ديالوگتىڭ باستاۋى.