الماتىدا ENERGO UNIVERSITY-دە انحالت قولدانبالى عىلىمدار ۋنيۆەرسيتەتىنىڭ فيليالى اشىلدى
18 قىركۇيەكتە الماتىدا Energo University (عۇماربەك داۋكەيەۆ اتىنداعى الماتى ەنەرگەتيكا جانە بايلانىس ۋنيۆەرسيتەتى) بازاسىندا انحالت قولدانبالى عىلىمدار ۋنيۆەرسيتەتىنىڭ فيليالىنىڭ اشىلۋ سالتاناتى ءوتتى، دەپ حابارلايدى aqshamnews.kz
ءىس-شاراعا گەرمانيانىڭ الماتىداعى باس كونسۋلى ماتتياس كيسلەر، انحالت ۋنيۆەرسيتەتىنىڭ پرەزيدەنتى يورگ باگدان، Energo University رەكتورى عاني نىعىمەتوۆ، انحالت ۋنيۆەرسيتەتىنىڭ الماتىداعى فيليالىنىڭ ديرەكتورى ەدۋارد سيمەنس جانە گەرمانيا عىلىم قورىنىڭ وكىلدەرى قاتىستى.
انحالت قولدانبالى عىلىمدار ۋنيۆەرسيتەتى قازاقستاندا نەمىس ءبىلىم بەرۋ باعدارلامالارى بويىنشا وقىتاتىن جانە نەمىس ۇلگىسىندەگى ديپلومدار بەرەتىن العاشقى نەمىس جوعارى وقۋ ورنى بولدى. جاڭا فيليالدا وقىتۋ اعىلشىن تىلىندە كەلەسى ماماندىقتار بويىنشا جۇرگىزىلەدى: جاڭارتىلاتىن ەنەرگيا، جۇيەلىك ينجەنەريا، بيوتەحنيكالىق جانە مەديسينالىق جۇيەلەر مەن اپپاراتتار، ەنەرگەتيكالىق ساياسات جانە حالىقارالىق ساۋدا.
العاشقى 30 ستۋدەنت بيىلعى جىلى مەملەكەتتىك گرانتتار مەن اقىلى نەگىزدە وقۋدى باستايدى دەپ جوسپارلانۋدا. جاقىن ارادا گرانتتىق قارجىلاندىرۋدىڭ كوبەيۋى كۇتىلۋدە، بۇل قازاقستاندىق ستۋدەنتتەردىڭ كوبىرەك سانىنا ساپالى ينجەنەرلىك ءبىلىم الىپ، ەكى بىردەي ديپلوم – وتاندىق جانە ەۋروپالىق ۇلگىدەگى ديپلومداردى الۋىنا مۇمكىندىك بەرەدى.
فيليالدا وقۋ بارىسىندا ستۋدەنتتەرگە نەمىس تىلىنەن قارقىندى كۋرستار وتكىزىلەدى، بۇل ولارعا وقۋدىڭ ءبىر بولىگىن جانە وندىرىستىك تاجىريبەنى گەرمانيادا وتۋگە مۇمكىندىك بەرەدى.
«فيليالدىڭ تۇلەكتەرى قازاقستاندا دا، گەرمانيا مەن باسقا دا ەۋروپالىق ەلدەردە دە كاسىبي قىزمەتىن جۇزەگە اسىرۋ ءۇشىن كەڭ مۇمكىندىكتەرگە يە بولادى»، - دەپ اتاپ ءوتتى انحالت ۋنيۆەرسيتەتىنىڭ پرەزيدەنتى يورگ باگدان.
باستاپقىدا فيليالدا وقىتۋدى نەمىس وقىتۋشىلارى جۇرگىزەدى. بىلىكتىلىكتى كەشەندى ارتتىرۋ باعدارلاماسىنان كەيىن قازاقستاندىق ارىپتەستەرى بىرتىندەپ وقىتۋدى ءوز قولدارىنا الادى. Energo Universityء-دىڭ العاشقى بەس وقىتۋشىسى ءقازىردىڭ وزىندە انحالت ۋنيۆەرسيتەتىندە تاعىلىمدامادان وتۋدە. كەلەسى جىلدىڭ ءساۋىر ايىندا تاعى ون وقىتۋشى گەرمانياعا ءبىر جىلدىق بىلىكتىلىكتى ارتتىرۋ كۋرسىنا بارۋدى جوسپارلاپ وتىر.
«ءبىزدىڭ ۋنيۆەرسيتەت پەن انحالت قولدانبالى عىلىمدار ۋنيۆەرسيتەتىنىڭ اراسىندا ۇزاق ۋاقىتتان بەرى سەرىكتەستىك قاتىناستار بار. فيليال اشىلعانعا دەيىن ءبىز بىرلەسىپ بەس قوس ديپلومدى باعدارلامانى ءساتتى ازىرلەپ، ىسكە قوستىق. بۇگىنگى وقيعا وسى قاتىناستاردىڭ زاڭدى جالعاسى بولدى. گەرمانيانىڭ جەتەكشى تەحنيكالىق ۋنيۆەرسيتەتتەرىنىڭ بىرىمەن سەرىكتەستىك ەلىمىزدىڭ ەكونوميكاسى ءۇشىن ساپالى مامانداردى دايارلاۋعا، سونداي-اق ولاردىڭ جاھاندىق نارىقتا باسەكەگە قابىلەتتى بولۋىنا ىقپال ەتەدى دەپ سەنەمىز»، - دەپ اتاپ ءوتتى Energo University رەكتورى عاني نىعىمەتوۆ.
بۇعان دەيىن ق ر عىلىم جانە جوعارى ءبىلىم ءمينيسترى ساياسات نۇربەك اتاپ وتكەندەي: «انحالت ۋنيۆەرسيتەتى ەنەرگەتيكا جانە تەلەكوممۋنيكاسيا سالاسىنداعى ساراپشى رەتىندە قازاقستاندا اشىلىپ جاتقان شەتەلدىك جوعارى وقۋ ورىندارىنىڭ جالپى توبىندا ماڭىزدى ءرول اتقارادى. ءبىز بۇل نەمىس ۋنيۆەرسيتەتىنىڭ ونەركاسىپتىك كومپانيالارمەن ىنتىماقتاستىق ورناتۋ تاجىريبەسىن سانالى تۇردە پايدالانعىمىز كەلەدى جانە سول ارقىلى ولاردى دا قازاقستانعا تارتىپ، سالا كوشباسشىلارىن بىرىكتىرۋدى كوزدەيمىز».