الماتىدا قازاقستانداعى ەڭ ءىرى ونلاين بيلەت ساتۋ سەرۆيسىنىڭ 10 جىلدىق مەرەيتويى اتاپ ءوتىلدى
رەسپۋبليكا سارايىندا كينو، تەاتر، سپورت جانە وزگە دە مادەني-سپورتتىق شارالارعا ونلاين بيلەت ساتاتىن Ticketon.kz سەرۆيسىنىڭ تۋعان كۇنىنە وراي وتاندىق جانە الەمدىك ساحنانى باعىندىرعان جۇلدىزداردىڭ قاتىسۋىمەن كونسەرتتىك كەش ۇيىمداستىرىلدى، دەپ حابارلايدى Almaty-akshamy.kz.
مەرەكەلىك شارا بارىسىندا Ticketon Award پرەمياسىنىڭ جەڭىمپازدارى، ۇزدىكتەر اراسىنداعى ۇزدىكتەر ماراپاتتالدى.
اتالمىش پرەميادا ونلاين سەرۆيستى پايدالانىپ ءوز قىزمەتتەرىن ۇسىناتىن ءار سالانىڭ ۇزدىكتەرى تاڭدالدى. داۋىس بەرۋ حالىق اراسىندا اشىق تۇردە ءوتتى، ياعني Ticketon ارقىلى ءوز ۇزدىكتەرىن تاڭداعان كورەرمەندەر جەڭىمپازداردى وزدەرى انىقتادى.
مەرەكەلىك كەشتە Ticketon Award سىيلىعىمەن ءبىرىنشى بولىپ كينو الەمىنىڭ ۇزدىكتەرى ماراپاتتالدى. حالىق تاڭداۋىمەن «برات يلي براك» كومەدياسىنىڭ باستى جۇلدىزى – داۋرەن سەرگازين جىلدىڭ ۇزدىك اكتەرى اتاندى. ال، وتكەن جىلدىڭ ۇزدىك اكتريساسى رەتىندە حالىق تاڭداۋى داريعا بادىقوۆاعا ءتۇستى. پرەميا تابىستاۋ كەزىندە «بيزنەس پو-كازاحسكي» جانە «گۋد باي موي باي-2» فيلمدەرىندە ءوز شەبەرلىگىن تانىتا العان اكتريسانى حالىق جىلى ىلتيپاتپەن قارسى الدى. ۇزدىك وتاندىق فيلم نوميناسياسىن ولجاس يبرايەۆتىڭ «پورتە: مالچيك نا پوبەگۋشكاح» تۋىندىسى جەڭىپ الدى.
ەكىنشى كەزەكتە، تەاتر سالاسىنىڭ ۇزدىكتەرى تاڭدالدى. جىلدىڭ ۇزدىك پرەمەراسى اتاعىن «بورتە» قويىلىمى يەلەنسە، سپەكتاكلدە باستى ءرولدى ويناعان اييا شاريپ تەاتردىڭ ۇزدىك اكتريساسى اتاندى. ال ەرلەر اراسىندا مۇنداي سىيلىققا «جاس ساحنا» تەاترىنىڭ اكتەرى نۇربولات راحاتوۆ لايىقتى بولدى. سونداي-اق، شارا ۇيىمداستىرۋشىلارى داۋىس بەرۋ ءادىل ءوتۋ ءۇشىن «جىل قويىلىمى» نوميناسياسىن مەملەكەتتىك جانە جەكەمەنشىك تەاترلار اراسىندا بولەك وتكىزدى. مەملەكەتتىك تەاترلار اراسىندا اتالمىش سىيلىق «بوپاي حانىم» قويىلىمىنا بەرىلدى. ال جەكەمەنشىك ساحنالار بايگەسىندە «سەانس» سپەكتاكلى ۇزدىك بولدى.
سپورت سالاسىنىڭ مىقتىلارى دا سىيلىقتان قۇر قالعان جوق. جىلدىڭ ۇزدىك ماچى رەتىندە الماتىلىق «قايرات» پەن «استانا» كلۋبتارىنىڭ اراسىنداعى ويىن تانىلدى. «جىل سپورتشىسى» اتاعى – ءبىرجان ورازوۆقا تابىستالدى. فۋتزالدان «قايرات» كلۋبىندا ونەر كورسەتەتىن سپورتشى ماراپاتتاۋ كەزىندە ءوز قۋانىشىن جاسىرمادى. سپورت سالاسىنىڭ ۇزدىكتەرىن ايەلدەر اراسىندا «جىل سپورتشىسى» اتاعىن يەلەنگەن دجيۋ-دجيتسۋدان ءۇش دۇركىن الەم چەمپيونى ءمولدىر مەكەنبايەۆا تۇيىندەدى.
«جىل ءارتىسى» اتاعى – Ticketon Award سىيلىعىنىڭ ەڭ تارتىستى نوميناسيالارىنىڭ ءبىرى. اتالعان سىيلىققا «يرينا قايراتوۆنا»، «Ninety One»، يمانبەك جانە وزگە دە حالىق سۇيىكتىلەرى ۇمىتكەر ەدى. دەگەنمەن، بۇل سىندا الەمدى تاڭداي قاقتىرعان ءانشى ديماش قۇدايبەرگەن ايقىن باسىمدىقپەن جەڭىسكە جەتىپ، «جىل ءارتىسى» نوميسانياسىن يەلەندى.
مەرەكەلىك شارانى «ۇزدىك يننوۆاسيالىق قالا» جانە «ۇزدىك تۋريستىك برەند» نوميناسيالارى قورىتىندىلادى. داۋىس بەرۋشىلەردىڭ قالاۋىمەن ءبىرىنشى سىيلىققا الماتى قالاسى، ال ەكىنشى نوميناسياعا شىمبۇلاق كۋرورتى لايىقتى دەپ تانىلدى.
ءار سالانىڭ ۇزدىكتەرىنە سىيلىق تابىستالعان سوڭ، ماراپاتتاۋ كەشى «Ninety One»، «Orda» جانە كەشتىڭ باستى جۇلدىزدارى بولعان «ا-STUDIO» توبى ونەر كورسەتكەن كونسەرتكە ۇلاستى.
ايتا كەتكەن ءجون، «Almaty aqshamy» جانە «ۆەچەرنيي الماتى» گازەتتەرى اتالمىش شاراعا اقپاراتتىق دەمەۋشى بولدى.
- ءبىزدىڭ دايەكتەمە
Ticketon.kz – كينو، تەاتر جانە سيرك قويىلىمدارىن، قازاقستاندىق جانە شەتەلدىك ەسترادا جۇلدىزدارىنىڭ كونسەرتتەرىن، ترەنينگتەر مەن سەمينارلاردى، مۇراجايلار مەن كوركەم گالەرەيالارعا ەكسكۋرسيالاردى، بالالار قويىلىمدارىن، ۇلتتىق كوماندالاردىڭ فۋتبول، حوككەي جانە باسكەتبول ماچتارىن، سونداي-اق حالىقارالىق اۋقىمداعى جارىستاردى قوسا العاندا، مادەني جانە سپورتتىق ءىس-شارالارعا بيلەتتەردى ونلاين-ساتۋدىڭ قازاقستانداعى ەڭ ءىرى سەرۆيسى.
ءىس-شارالاردى جىلجىتۋ جانە بيلەتتەردى تاراتۋ بويىنشا كوپ دەڭگەيلى قىزمەت كورسەتەتىن Ticketon.kz ءىس-شارالاردى ۇيىمداستىرۋشىلار مەن ساتىپ الۋشىلار اراسىنداعى نەگىزگى دانەكەر بولىپ تابىلادى.
Ticketon.kz قازاقستاننىڭ 20-دان استام قالاسىنداعى نىسانداردى قامتيدى، سەرۆيسكە بۇكىل ەل بويىنشا 30-دان استام كينوتەاتر جانە 40 تەاتر قوسىلعان.