الماتى قالاسىنىڭ اكىمى دارحان ساتىبالدىنىڭ توراعالىعىمەن وتكەن القالى جيىندا ەلەكتروندىق ساۋدانىڭ قازىرگى جاي-كۇيى مەن ونىڭ دامىتۋ باعىتتارى تالقىلاندى. باسقوسۋدا الماتىنى قازاقستان مەن ورتالىق ازياداعى ەلەكتروندىق كوممەرسيانىڭ باستى ورتالىعى رەتىندە ءرولىن نىعايتۋ ماسەلەسىنە باسا نازار اۋدارىلدى.
قالالىق كاسىپكەرلىك جانە ينۆەستيسيالار باسقارماسىنىڭ مالىمەتىنشە، 2024 جىلدىڭ قورىتىندىسى بويىنشا الماتىداعى ەلەكتروندىق ساۋدا كولەمى 5،3 ترلن تەڭگە بولعان. بۇل كورسەتكىش وتكەن جىلمەن سالىستىرعاندا 42% جوعارى. ونىڭ ىشىندە 3 ترلن تەڭگەسى تاۋارلاردىڭ بولشەك ساۋداسىنا، 2،3 ترلن تەڭگە ونلاين قىزمەت كورسەتۋگە تيەسىلى. وسىلايشا، الماتىنىڭ رەسپۋبليكا بويىنشا ونلاين ساۋداداعى ۇلەسى 90%-دان اسىپ وتىر.
الماتىدا 1500-دەن استام بەلسەندى ەلەكتروندىق كوممەرسيا سۋبەكتىسى جۇمىس ىستەيدى، بۇل ەل اۋماعىندا تىركەلگەندەردىڭ شامامەن جارتىسى. نەگىزگى باعىتتارعا كۇندەلىكتى تۇتىناتىن تاۋارلار، تەحنيكا، كيىم-كەشەك، كوسمەتيكا، سونداي-اق، جەتكىزۋ، كولىك جانە برونداۋ سالالارىنداعى قىزمەتتەر جاتادى.
ماڭىزدى باعىتتاردىڭ ءبىرى لوگيستيكا جانە قويما ينفراقۇرىلىمىن دامىتۋ. قالادا ەلەكتروندىق ساۋداعا بەيىمدەلگەن تاراتۋ ورتالىقتارى ىسكە قوسىلىپ، ءىرى لوگيستيكالىق نىسانداردىڭ قۇرىلىسى قۇرىلىسى قارقىن الىپ كەلەدى. بۇل ءوز كەزەگىندە جاڭا جۇمىس ورىندارىنىڭ اشىلۋىنا، ونلاين تاپسىرىس قابىلداۋ مەن جەتكىزۋ جىلدامدىعىن ارتتىرۋعا مۇمكىندىك بەرەدى.
كەزدەسۋ بارىسىندا قالا بازارلاردى جاڭعىرتۋ ەلەكتروندىق ساۋدا جۇيەسىنىڭ قوسىمشا ەلەمەنتى رەتىندە قارالدى. الماتىداعى 59 بازاردىڭ 41ء-ى جاڭارتۋدان وتكەن. بۇل نىسانداردا سيفرلىق ساۋدا جۇيەسى ەنگىزىلىپ، تۇراقتى ينتەرنەت جەلىسى تارتىلىپ، ساقتاۋ، لوگيستيكا جانە قولما-قول اقشاسىز تولەم ايماقتارى جۇيەلەنىپ كەلەدى. 10 مىڭنان استام ساتۋشى ءداستۇرلى ساۋدا ءتاسىلىن ونلاين فورماتپەن ءساتتى ۇشتاستىرىپ وتىر.
سونىمەن قاتار شاعىن جانە ورتا بيزنەستى قولداۋ شارالارى تالقىلاندى. شاھاردا سيفرلىق داعدىنى دامىتۋ، حالىقارالىق پلاتفورمالارمەن جۇمىس ىستەۋدى ۇيرەتۋ جانە ونلاين ارنالار ارقىلى شيكىزاتتىق ەمەس ءونىمدى ەكسپورتتاۋعا باعىتتالعان ءبىلىم جانە كەڭەس بەرۋ باعدارلامالارى جۇزەگە اسىرىلىپ وتىر.
كەڭەس سوڭىندا قالا باسشىسى دارحان ساتىبالدى ينفراقۇرىلىمدىق جوبالاردى جۇزەگە اسىرۋدى جەدەلدەتۋدى، سيفرلاندىرۋ ءىسىن كەڭەيتۋدى جانە ونلاين پلاتفورمالارمەن سەرىكتەستىكتى كۇشەيتۋدى تاپسىردى. جوسپارعا ساي، 2025 جىلدىڭ سوڭىنا قاراي الماتىداعى ەلەكتروندىق بولشەك ساۋدا كولەمى 3،5 ترلن تەڭگەگە جەتىپ، ال 2030 جىلعا قاراي بولشەك ساۋدا اينالىمىنداعى ەلەكتروندىق ساۋدانىڭ ۇلەسى 50%-دان كەم بولمايدى دەگەن ءۇمىت بار.