14 شاعىناۋداندا سۋمەن جابدىقتاۋ جانە كارىز جەلىلەرىنىڭ قۇرىلىسى جالعاسادى.
الماتى وڭىرلىك كوممۋنيكاسيالار قىزمەتىندە وتكەن بريفينگتە قالا اكىمىنىڭ ورىنباسارى مۇحيت ازىربايەۆ مەگاپوليستىڭ ينجەنەرلىك ينفراقۇرىلىمىن دامىتۋ تۋرالى ايتىپ بەردى، دەپ حابارلايدى Almaty-akshamy.kz.
سپيكەردىڭ ايتۋىنشا، اعىمداعى جىلى 14 شاعىن اۋداندا سۋمەن جابدىقتاۋ جانە كارىز جەلىلەرىنىڭ قۇرىلىسى جالعاسادى، ال التى شاعىناۋداندا جاڭاسى باستالادى.
«بۇدان باسقا، قارعالى وزەنىندە جوبالىق قۋاتى تاۋلىگىنە 15 مىڭ م3 سۋ الاتىن سۋ تارتۋ قۇرىلىسىنىڭ قۇرىلىسى جۇزەگە اسىرىلۋدا. اقساي وزەنىندەگى جەرۇستى كوزى بويىنشا 2022 جىلى جوبالىق قۋاتى تاۋلىگىنە 22 مىڭ تەكشە مەتر سۋ تارتۋ قۇرىلىسىن سالۋ جوسپارلانۋدا. بوستاندىق اۋدانىندا جوبالىق قۋاتى تاۋلىگىنە 9 مىڭ تەكشە مەتر سۋ جيناۋ نىسانى مەن سۋ دايىنداۋ ستانسياسىنىڭ (ەرمەنساي) قۇرىلىسى جوبالانۋدا. ساراپتاما قورىتىندىسىن الۋ 2022 جىلدىڭ ناۋرىز ايىنا جوسپارلانعان»، - دەدى مۇحيت ازىربايەۆ.
اكىم ورىنباسارىنىڭ ايتۋىنشا، بيىل 1 066 كوشە مەن 486 اۋلا اۋماعىندا سىرتقى جارىقتاندىرۋ قۇرىلىسى اياقتالادى، جىل ىشىندە 24 كوشەنى جارىقتاندىرۋ جاڭارتىلدى.
مۇحيت ازىربايەۆتىڭ ايتۋىنشا، بيىل مەدەۋ، الاتاۋ جانە ناۋرىزباي اۋداندارىندا جالپى ۇزىندىعى 147،2 كم ەلەكتر جەلىسىن رەكونسترۋكسيالاۋ اياقتالادى.
«ەكى جاڭا قوسالقى ستانسيانىڭ قۇرىلىسى بويىنشا جۇمىستار جۇرگىزىلۋدە: بوستاندىق اۋدانىنداعى 200 مىڭ تۇتىنۋشىنى قامتي وتىرىپ، الماگۇل قس بويىنشا – 100 مۆت، مەدەۋ جانە تۇركسىب اۋداندارىنداعى 200 مىڭعا جۋىق تۇتىنۋشىنى قامتي وتىرىپ، تۇزدىباستاۋ قس بويىنشا – 64 مۆت قۋاتتىلىقتىڭ ءوسۋى»، - دەپ ناقتىلادى ول.
سونداي-اق، جەتىسۋ اۋدانىندا جالپى قۋاتى 50 مۆت «كيرپيچنايا» قس بويىنشا كونكۋرستىق ۇردىستەر باستالدى.
اكىمنىڭ ورىنباسارى اتاپ وتكەندەي، جىلۋمەن ۇزدىكسىز قامتاماسىز ەتۋ جانە جىلۋ ەنەرگياسىنىڭ تاپشىلىعىن جويۋ ءۇشىن قازاندىقتاردىڭ قۋاتىن ارتتىرۋ بويىنشا جۇمىستار جۇرگىزىلۋدە: 2019 جىلى باستالعان نەگىزگى جانە قوسالقى جابدىقتى اۋىستىرا وتىرىپ، «وڭتۇستىك اۋداندىق قازاندىقتى» قايتا جاڭارتۋ 55 گكال/ساع قۋات ءوسىمىن قامتاماسىز ەتەدى. بۇدان باسقا، وتكەن جىلى «پرەمەرا» قازاندىعىن كەڭەيتۋ بويىنشا جۇمىستار باستالدى، ونىڭ قۋاتى 100 گكال/ساع.