ولار ءداستۇرلى وقىتۋ فورماتىنا ورالعان.
الماتىلىق اتا-انالار ەپيداحۋالدىڭ جاقسارۋىن باقىلاي وتىرىپ، قاشىقتان وقىتۋ فورماتىنان باس تارتىپ، بالالارىن مەكتەپكە جىبەردى، دەپ حابارلايدى Almaty-akshamy.kz.
ءبىلىم جانە عىلىم مينيسترلىگىنىڭ مالىمەتى بويىنشا، جاڭا وقۋ جىلىنىڭ باسىندا الماتىداعى ەپيدەميولوگيالىق جاعدايعا بايلانىستى اتا-انالارعا وقىتۋ فورماتىن تاڭداۋ مۇمكىندىگى بەرىلدى. سول كەزدە ءبىلىم الۋشىلاردىڭ اراسىندا ونلاين فورماتتى تاڭداعانداردىڭ سانى از بولدى. ياعني، وقۋشىلاردىڭ تەك 5،6%-ى، ياعني 300 مىڭنان استام وقۋشىنىڭ تەك 17 مىڭنان كەم ەمەس بولىگى ونلاين فورماتتا وقۋعا نيەتتى بولدى.
«مەنىڭ نەمەرەم بيىل ءبىرىنشى سىنىپقا باردى. ورىن العان ەپيدجاعدايعا الاڭداپ، ونلاين وقىتۋ فورماتىن تاڭدادىق. الايدا، نەمەرەم ۇيدە وتىرماي، سىنىپتاستارىمەن جانە مۇعالىمدەرمەن ارالاسقىسى كەلەدى. ءبارىبىر بالالارىمىز كوشەدە ويناپ، دۇكەنگە جانە قوناققا بارادى، ۇيىرمەلەرگە قاتىسادى. سوندىقتان ءبىز ءداستۇرلى وقىتۋ فورماتىن تاڭدادىق. ءبىز قاشىقتان ءبىلىم الاتىن بالانىڭ ەرىنشەكتىك تانىتىپ، نازارى باسقا نارسەلەرگە اۋاتىنىن، قوسىمشا باسقا دا ىستەرمەن اينالىساتىنىن ءارى وقۋ ماتەريالىن جەتكىلىكسىز دەڭگەيدە مەڭگەرەتىنىن تۇسىندىك. پاندەميا قاشان اياقتالاتىنى بەلگىسىز. ىندەتتىڭ اياقتالۋىن كۇتىپ، ءبىلىم ساپاسىن جوعالتىپ الماعانىمىز ماڭىزدى»، – دەپ اتاپ ءوتتى الماتى قالاسىنىڭ تۇرعىنى گۇلباحار ۆالييەۆا.
الماتى قالاسى اكىمدىگى ءبىلىم باسقارماسىنىڭ باسشىسى ءلاززات جىلقىبايەۆا قالادا 300-گە جۋىق مەكتەپ بار ەكەنىن اتاپ ءوتتى.
وقۋشىلاردىڭ جالپى سانى بويىنشا بالالاردىڭ سىرقاتتانۋ پايىزى وقۋ جىلى باستالعانعا دەيىنگى سىرقاتتانۋ دەڭگەيىمەن سالىستىرعاندا بىرنەشە ەسە تومەن. مەكتەپتەردە بالالاردىڭ دەنساۋلىعىن قورعاۋدى قامتاماسىز ەتۋ ءۇشىن كەشەندى سانيتارلىق شارالار قابىلداندى.
«يكەمدى ساباق كەستەسى قۇرىلىپ، باستاۋىش، ورتا جانە جوعارى سىنىپ وقۋشىلارى ءۇشىن قوسىمشا اۋىسىمدار مەن ءارتۇرلى ۋاقىتتا ۇزىلىستەر ۇيىمداستىرىلدى. وقۋشىلاردىڭ ءبىر كابينەتتەن ەكىنشى كابينەتكە اۋىسۋىنا تىيىم سالىندى. ساباقتار «ءبىر سىنىپ – ءبىر كابينەت» قاعيداتى بويىنشا جۇرگىزىلەدى. مۇعالىمدەر مەن اتا-انالار اراسىندا سانيتارلىق تالاپتاردى ساقتاۋ بويىنشا ءتۇسىندىرۋ جۇمىستارى جۇرگىزىلىپ جاتىر»، – دەيدى ءلاززات جىلقىبايەۆا.