الماتىدا ەكى ەسىرتكى قىلمىسىنىڭ جولى كەسىلدى

ەكەۋىنەن دە ءىرى مولشەردەگى ەسىرتكى زاتتارى تاركىلەندى.

الماتىنىڭ ەكى اۋدانىندا ەسىرتكى قىلمىسىنىڭ جولى كەسىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

ءبىرىنشى جاعدايدا 27 جاستاعى ەر ادام ۇستالدى. ونى جەكە ءتىنتۋ كەزىندە پوليسەيلەر اق ءتۇستى ۇنتاقتى زات سالىنعان بۋمانى تاركىلەدى.

«ق ر قك-نىڭ 296-بابى 4-بولىگىندە كوزدەلگەن قىلمىس بەلگىلەرى بويىنشا قىلمىستىق ءىس قوزعالدى. ساراپتاما قورىتىندىسىنا سايكەس، بۇل زات – اسا ءىرى مولشەردەگى سينتەتيكالىق ەسىرتكى. بەلگىلى بولعانداي، ۇستالعان ازامات قۇرىلىسشى بولىپ جۇمىس ىستەيدى جانە ەسىرتكىنى «وزىنە» ساتىپ العان. تەرگەۋ بارىسىندا كۇدىكتى ۋاقىتشا ۇستاۋ يزولياتورىنا قامالدى»، – دەدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.

ال قالانىڭ المالى اۋدانىندا 40 جاستاعى جۇمىسسىز ازامات ۇستالدى. ول ەسىرتكىنى قويىپ كەتۋمەن اينالىسقان.

«جەدەل ىزدەستىرۋ ءىس-شارالارى بارىسىندا ەسىرتكىنى زاڭسىز ساتىپ الدى جانە ساقتادى دەگەن كۇدىكپەن 40 جاستاعى ج.ەسىمدى ازامات ۇستالدى. جەكە ءتىنتۋ كەزىندە ىشىندە اقشىل ءتۇستى ۇنتاقتى زاتى بار، قارا يزولەنتاعا ورالعان 16 بۋما تابىلدى جانە تاركىلەندى. ساراپتاما تاعايىندالدى، ونىڭ قورىتىندىسى بويىنشا پروسەسسۋالدىق شەشىم قابىلداناتىن بولادى»، – دەدى المالى اۋداندىق پوليسيا باسقارماسىنىڭ باستىعى ەسەن ىسقاقوۆ.

ۇستالعان ادامنىڭ ايتۋىنشا، بۇل زات - ينتەرنەت ارقىلى ساتىپ الىنعان سينتەتيكالىق مەفەدرون ەسىرتكىسى. ول بۋمالاردى مەكەنجايلارعا اپارۋ كەرەك بولاتىن. اتالعان دەرەك بويىنشا ق ر قك-نىڭ 296-بابى 2-بولىگىنە سايكەس قىلمىستىق ءىس تىركەلدى.