بۇگىن الماتىدا EdUHK جانە QyzPU اراسىنداعى بىرلەسكەن كاسىبي دامۋ ورتالىعىنىڭ سالتاناتتى اشىلۋ ءراسىمى ءوتتءى، دەپ حابارلايدى aqshamnews.kz.
جوبا قازاق ۇلتتىق قىزدار پەداگوگيكالىق ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى جانە گونكونگ بءىلىم ۋنيۆەرسيتەتىمەن بىرلەسىپ قۇرىلعان بءىلىم اكادەمياسى اياسىندا ىسكە اسىرىلۋدا. ورتالىقتىڭ اشىلۋى عىلىمي الماسۋدى تەرەڭدەتۋ جانە جوعارى بىلىكتى مامانداردى دايارلاۋ ءۇشىن نەگىز بولماق. جوبا اياسىندا STEAMء-بىلىم بەرۋدى، كوشباسشىلىقتى جانە باعالاۋدى دامىتۋعا ەرەكشە نازار اۋدارىلادى.
كاسىبي دامۋ ورتالىعىنىڭ اشىلۋ سالتاناتىندا قىزىل لەنتانى قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما ءتوراعاسى – رەكتورى گۇلميرا قاناي جانە گونكونگ ءبىلىم بەرۋ ۋنيۆەرسيتەتىنىڭ پرەزيدەنتى، پروفەسسور لي چي كين دجون قيدى.
«ءبىز قازاق ۇلتتىق قىزدار پەداگوگيكالىق ۋنيۆەرسيتەتىمەن ىنتىماقتاستىق ورناتقانىمىزعا قۋانىشتىمىز جانە ونى ۇلكەن مارتەبە سانايمىز. ءبىزدىڭ كوزقاراسىمىز ورتاق – مۇعالىمدەردىڭ كاسىبي دەڭگەيىن ارتتىرۋ، قازاقستانداعى ءبىلىم بەرۋ ساپاسىن جاقسارتۋ، سونداي-اق گونكونگ اار (جۇڭگو) مەن قازاقستان اراسىنداعى ىسكەرلىك الماسۋدى دامىتۋ. گونكونگ ۋنيۆەرسيتەتىنىڭ كوپ جىلدىق تاريحى بار جانە ءبىلىم بەرۋ سالاسىندا رەيتينگى جوعارى. كوشباسشىلىق، STEM ءبىلىم بەرۋ جانە باعالاۋ سالالارىندا تاجىريبەمىز مول جانە وسى باعىتتاردا بىلىمىمىزبەن بولىسۋگە، وقىتۋ مۇمكىندىكتەرىن ۇسىنۋعا، سونداي-اق ۋنيۆەرسيتەتتەرمەن بىرلەسكەن زەرتتەۋلەر جۇرگىزۋگە دايىنبىز. ءبىز بۇل ماڭىزدى اكادەميانىڭ بولاشاق ىنتىماقتاستىق ءۇشىن پلاتفورما رەتىندە قىزمەت ەتەتىنىنە سەنىمدىمىز»، – دەدى گونكونگ ءبىلىم بەرۋ ۋنيۆەرسيتەتىنىڭ پرەزيدەنتى، پروفەسسور لي چي كين دجون.
QyzPU رەكتورى گۇلميرا قانايدىڭ ايتۋىنشا، EdUHK – قازاقستان ءبىلىم اكادەمياسى اياسىندا مۇعالىمدەردىڭ كاسىبي بىلىكتىلىگىن ارتتىرۋ ماقساتىندا ءۇش باعىت بويىنشا وقۋ باعدارلامالارىن ازىرلەۋ جوسپارلانۋدا.
«ەلىمىزدە ۇلكەن ماڭىزدى جوبالاردىڭ ءبىرى ىسكە اسىرىلىپ جاتىر. قازىرگى تاڭدا قازاق ۇلتتىق قىزدار پەداگوگيكالىق ۋنيۆەرسيتەتى، اباي اتىنداعى ۋنيۆەرسيتەت جانە گونكونگ ءبىلىم ۋنيۆەرسيتەتى بىرلەسىپ ۇلكەن اكادەميا قۇرۋدا. وسى اكادەميا اياسىندا مۇعالىمدەردىڭ بىلىكتىلىگىن ارتتىرۋعا باعىتتالعان بەس وقۋ باعدارلاماسىن ازىرلەۋدى جوسپارلاپ وتىرمىز. ءۇش ۋنيۆەرسيتەت ازىرلەيتىن بۇل باعدارلامالار حالىقارالىق دەڭگەيدە سەرتيفيكاتتالىپ، مەكتەپ مۇعالىمدەرىنىڭ كاسىبي بىلىكتىلىگىن ارتتىرۋعا كومەكتەسەدى. Abai University جاساندى ينتەللەكت جانە ينكليۋزيۆتى ءبىلىم بەرۋ بويىنشا نەگىزگى باعدارلامالاردى ازىرلەيدى. QyzPU كوشباسشىلىق، STEAMء-بىلىم بەرۋ جانە باعالاۋ ماسەلەلەرىنە جاۋاپتى بولادى. قازىرگى ۋاقىتتا ەلىمىزدە 800-دەن استام «كومفورتتى مەكتەپتەر» سالىنۋدا. وسى مەكتەپتەرگە ماماندار دايارلاۋ مەن كوشباسشىلىق بويىنشا كۋرستار وتكىزۋ وتە ماڭىزدى. كوشباسشىلىق باعىتى بويىنشا قازىرگى جانە بولاشاق مەكتەپ باسشىلارىنىڭ داعدىلارى مەن ءبىلىمىن دامىتۋعا كوڭىل بولىنەدى. سونىمەن قاتار STEMء-بىلىم بەرۋدى دامىتۋ، اسىرەسە قىز بالالاردى وسى باعىتتار بويىنشا وقىتۋ – الەمدىك تۇراقتى دامۋ مەن گەندەرلىك تەڭدىك ماقساتتارىنىڭ ءبىرى. وسىعان بايلانىستى ءبىز مۇعالىمدەرگە ارنالعان STEM باعىتىنداعى بىلىكتىلىكتى ارتتىرۋ كۋرستارىن ۇيىمداستىرۋدى جانە ۋنيۆەرسيتەتىمىزدىڭ ستۋدەنتتەرى مەن مەكتەپ مۇعالىمدەرىنە ارنالعان وقۋ باعدارلامالارىن جەتىلدىرۋدى جوسپارلاپ وتىرمىز. ءۇشىنشى باعىت – ءبىلىمدى باعالاۋ جۇيەسىن جەتىلدىرۋ، باعالاۋ تۇرلەرىن سىنىپتىق، ۇلتتىق جانە حالىقارالىق دەڭگەيدە دامىتۋ. ءۇش ۋنيۆەرسيتەت اراسىنداعى بۇل اۋقىمدى باستاما بولاشاقتا وڭ وزگەرىستەرگە الىپ كەلەتىنىنە سەنىمدىمىز. ءبىز بۇل باعدارلامالاردى مەكتەپ مۇعالىمدەرىنە وسى جىلدىڭ كۇزىنە قاراي ۇسىنۋدى جوسپارلاپ وتىرمىز»، – دەدى QyzPU رەكتورى گۇلميرا قاناي.
ءىس-شاراعا قازاقستان مەن گونكونگ ۋنيۆەرسيتەتتەرىنىڭ وكىلدەرى، وقىتۋشىلارى جانە ستۋدەنتتەرى قاتىستى. كاسىبي دامۋ ورتالىعىنىڭ اشىلۋىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ عىلىمي جۇمىس جانە حالىقارالىق ىنتىماقتاستىق جونىندەگى پرورەكتورى زاكير جۇماكۇلوۆ ءسوز سويلەدى. ءوز سوزىندە ول مينيستر ساياسات نۇربەك ءبىر جىل بۇرىن ايتقان باستاما جۇزەگە اسىرىلىپ جاتقانىن اتاپ ءوتتى.
«پەداگوگيكالىق ۋنيۆەرسيتەتتەر رەتىندە ءبىزدىڭ ميسسيامىز – مەكتەپ ءبىلىمىن جاقسارتۋ. مەكتەپ جۇيەسىن الدىڭعى قاتارلى بىلىممەن قامتاماسىز ەتۋ ءۇشىن بىرلەسىپ عىلىمي زەرتتەۋلەر جۇرگىزۋ جانە ۇنەمى جاڭا ءبىلىمنىڭ شىڭىندا بولۋ كەرەك. وسى سەبەپتى عالىمدار تاڭدالعان باعىتتار بويىنشا بىرلەسكەن زەرتتەۋلەر جۇرگىزەتىن بولادى. جۇرگىزىلگەن جۇمىستىڭ ناتيجەسى ۇلتتىق دەڭگەيدە اسەر ەتەتىن بولادى، ويتكەنى بىرلەسكەن اكادەميا قازاقستاننىڭ وڭىرلىك جوعارى وقۋ ورىندارىنىڭ اليانسىن دا قامتيدى، وعان پەداگوگيكا بويىنشا ءبىلىم بەرۋ باعدارلامالارى بار 6 جوعارى وقۋ ورنى كىرەدى»، – دەدى ول.
EdUHK جانە QyzPU اراسىنداعى بىرلەسكەن كاسىبي دامۋ ورتالىعىنىڭ سالتاناتتى اشىلۋ ءبىلىم بەرۋ جۇيەسىن ترانسفورماسيالاۋدا، الەمدىك وزىق تاجىريبەلەردى ەنگىزۋدە جانە حالىقارالىق ىنتىماقتاستىقتى دامىتۋدا ماڭىزدى قادام بولىپ تابىلادى. اكادەميالىق الماسۋ مەن يننوۆاسيالاردى ەنگىزۋگە باعىتتالعان بۇل باعدارلاما جاستاردى قازىرگى زاماننىڭ تالاپتارىنا ساي ماماندار رەتىندە دايارلاۋعا ۇلەس قوسادى.