ءقازىر قالادان ديزەل وتىنىن تابۋ قيىن.
كەيبىر جانارماي قۇيۋ بەكەتتەرى شەكتەپ بەرەتىن بولعان. قۇنى بىلاي تۇرسىن، ساپاسىنا سىن ايتۋشىلار دا كوپ. العاشقى قار جاۋىپ، ازداپ كۇن سۋىتىپ ەدى، ديزەل سىر بەرە باستادى، دەپ حابارلايدى Almaty-akshamy.kz «حابار 24»-كە سىلتەمە جاساپ.
اپتا باسىندا الماتىدا كۇن سۋىتتى. ءبىراق ءدال وسىنداي اۋا رايىندا ماۋسىمارالىق ديزەلدىڭ قاتۋىن ءبىرىنشى رەت كورىپ وتىرمىز دەيدى كوپ جىلدىق تاجىريبەسى بار كولىك جۇرگىزۋشىلەرى جانارمايدىڭ قويمالجىنعا اينالىپ كەتكەندىگىن جۇرگىزۋشىلەر الەۋمەتتىك جەلىلەرگە جارىسا جاريالاپ، اشۋ-ىزالارىن ءبىلدىرىپ جاتتى. بۇعان قوسا، ءقازىر قالادان ديزەل وتىنىن تابۋ قيىن. ال باعاسى شارىقتاپ تۇر.
رۋسلان قامبولوۆ، كولىك جۇرگىزۋشى: - بۇرىن مينۋس 10-15 گرادۋستا جۇرە بەرەتىنبىز. ءقازىر دالا جىلى، جانارماي مۇز بولىپ قاتىپ جاتىر. ايتاتىنى جوق. وندايدى ساتپاي-اق، ۇيدە جاتقان جاقسى. 1-2 جەردە عانا ساتىپ جاتىر. كەشە بارساق، 70 ليتر، 30 ليتر دەيدى. ءبىراق كۇندە جاعىپ تاستايتىن جانارماي عوي.
دياس نۇرعالييەۆ، كولىك جۇرگىزۋشى: - جانارمايدىڭ ساپاسى وتە ناشار بولعاندىقتان پارافين دەگەن وتە كوپ. سۋ قاتقان جوق، جانارماي قاتىپ جاتتى عوي. جولدا قانشاما تۇردىق.
ءبىر عانا رىسقۇلوۆ داڭعىلىنىڭ بويىندا 30-عا جۋىق جانار-جاعارماي قۇيۋ بەكەتى بار. الايدا، ديزەل تاپشى. ول نە تالونمەن نەمەسە ارنايى كارتامەن وتە از مولشەردە عانا بەرىلەدى. ىزدەپ ءجۇرىپ تاپساڭىز دا، ءليترى 285 تەڭدەگەن تومەنىنە سيرەك جولىعاسىز. وعان دا ۇزىن سونار كەزەك بار.
ستانيسلاۆ ياروشەنكو، تاسىمالداۋ كومپانياسىنىڭ باسشىسى: - جانارماي قىمباتتاسا، تاۋاردى تاسىمالداۋ باعاسى دا وسەدى. سەبەبى جۇك كولىكتەرىنىڭ جول شىعىنىنا جۇمسالاتىن اقشانىڭ 30-50 پروسەنتى جانارمايعا كەتەدى. ول نارىقتاعى وزگە دە ءونىم مەن قىزمەت تۇرلەرىنىڭ قۇنىنا اسەر ەتپەي قويمايدى. بۇعان قوسا ساپاسىز ديزەل اۆتوكولىك قوزعالتقىشىنىڭ مەرزىمىنەن بۇرىن بۇزىلۋىنا اكەلەدى. ونى جوندەۋ ءۇشىن كولىك يەسى تاعى شىعىندانادى.
الدا قىس كەلە جاتىر. سوندىقتان جاۋاپتى مەكەمەلەر ساپا مەن باعا ماسەلەسىن ەرتەرەك رەتتەسە دەيدى جۇك تاسۋشىلار. جالپى وتىن ساپاسىن باقىلاۋ جانارمايدى كوتەرمە جانە بولشەك ساتۋمەن اينالىساتىنداردىڭ جاۋاپكەرشىلىگىنە تيەسىلى. سوندىقتان جانارماي قۇيعان سوڭ تۇبىرتەك الۋدى ۇمىتپاعان ابزال. ەگەر ساپاسىز سولياركانىڭ كەسىرىنەن كولىگىڭىزگە زيان تيسە، ارىزدانۋعا قاجەت بولادى.