قازاقستاننىڭ كورنەكتى مەملەكەت جانە قوعام قايراتكەرى، ءۇش مارتە سوسياليستىك ەڭبەك ەرى، ديپلومات، اكادەميك دىنمۇحامەد احمەت ۇلى قونايەۆتىڭ تۋعانىنا 114 جىل تولۋىنا وراي الماتى قالاسىندا د. ا. قونايەۆتىڭ ەسكەرتكىشىنە گۇل شوقتارىن قويۋ ءراسىمى ءوتتى.
تاعزىم ەتۋ شاراسىنا الماتى قالاسى ءماسليحاتىنىڭ ءتوراعاسى مەيىرجان وتىنشييەۆ، الماتى قالاسى مادەنيەت باسقارماسىنىڭ باسشىسى دانيار الييەۆ، حالىقارالىق د. قونايەۆ قورىنىڭ پرەزيدەنتى ەلدار قونايەۆ، م. اۋەزوۆ مۋزەيىنىڭ ديرەكتورى ديار قونايەۆ، دىنمۇحامەد احمەت ۇلىنىڭ قىزمەتتەستەرى مەن تۋعان-تۋىستارى، مەملەكەت جانە قوعام قايراتكەرلەرى، جوعارى وقۋ ورىندارىنىڭ ستۋدەنتتەرى، سونداي-اق قالا تۇرعىندارى مەن قوناقتارى قاتىستى.
شارا بارىسىندا ءسوز سويلەگەن ەلدار اسقار ۇلى:
«بۇگىن دىنمۇحامەد احمەت ۇلى قونايەۆتىڭ تۋعانىنا 114 جىل تولىپ وتىر. ول – ەلىمىزدىڭ دامۋى مەن قالىپتاسۋىنا ولشەۋسىز ۇلەس قوسقان تاريحي تۇلعا. ونىڭ ەرەن ەڭبەگى مەن مەملەكەتشىل بولمىسى قازاقستان تاريحىندا ايرىقشا ورىن الادى»، – دەپ اتاپ ءوتتى.
سونداي-اق ءىس-شارا اياسىندا رمك «عىلىم ورداسى» اكادەمياسى اتىنان دىنمۇحامەد احمەت ۇلى قونايەۆقا قاتىستى بارلىق رەسمي قۇجاتتار د. ا. قونايەۆ مۋزەيىنىڭ قورىنا تابىستالدى. بۇل قۇندى مۇرا ۇلى تۇلعانىڭ ساياسي، عىلىمي جانە قوعامدىق قىزمەتىن تەرەڭىرەك زەردەلەۋگە مۇمكىندىك بەرەدى.
سونىمەن قاتار، شاراعا جينالعان قوناقتار ءۇشىن د. ا. قونايەۆ مۋزەيى مەن مەموريالدى پاتەر-مۋزەيىندە ارنايى ەكسكۋرسيالار ۇيىمداستىرىلىپ، مۋزەي قىزمەتكەرلەرى دىنمۇحامەد احمەت ۇلىنىڭ ءومىر جولى، ەل باسقارۋداعى كەمەڭگەرلىگى مەن ادامگەرشىلىك بولمىسى تۋرالى تىڭ دەرەكتەرمەن ءبولىستى.
دىنمۇحامەد قونايەۆ – حالقىنىڭ جۇرەگىنەن ورىن العان، ەلىنىڭ بولاشاعى ءۇشىن ايانباي قىزمەت ەتكەن ءبىرتۋار ۇلى تۇلعا. ونىڭ پاراساتتى ساياساتى، قاراپايىمدىلىعى مەن ادىلدىگى بۇگىنگى ۇرپاق ءۇشىن ونەگە، ال ەسىمى – قازاق حالقىنىڭ تاريحي جادىندا ماڭگى وشپەس جارىق جۇلدىز بولىپ قالا بەرەدى.