الماتىدا ءدىني تاقىرىپتاعى ۇزدىك جۇمىستاردى (ماقالالار، بەينەروليكتەر جانە ت.ب.) دايىنداۋ بويىنشا وتكەن بايقاۋ جەڭىمپازدارىن ماراپاتتاۋ ءراسىمى ءوتتى.
ءىس-شارانى الماتى قالاسى ءدىن ىستەرى باسقارماسىنىڭ تاپسىرىسى بويىنشا «JASTAR» جاستار قوعامدىق بىرلەستىگى ۇيىمداستىردى، دەپ حابارلايدى aqshamnews.kz.
شىعارماشىلىق جارىسقا الماتىدا جۇمىس ىستەيتىن جەرگىلىكتى جانە رەسپۋبليكالىق ب ا ق جۋرناليستەرى، ستۋدەنتتەر، تاۋەلسىز پۋبليسيستەر مەن بلوگەرلەر قاتىستى. بايقاۋعا ون نوميناسيا بويىنشا 220-دان استام ءوتىنىم ءتۇستى. جۇمىستار زايىرلىلىق، تولەرانتتىلىق، كونفەسسياارالىق كەلىسىم، قازاق حالقىنىڭ رۋحاني قۇندىلىقتارى، ءداستۇر مەن ءدىن، پاتريوتيزم، وتانعا دەگەن ماحاببات، قازاقستاننىڭ تاريحي جانە قاسيەتتى ورىندارى، راديكالدى يدەولوگيانىڭ زياندىلىعى جانە دەسترۋكتيۆتى ءدىني اعىمدار سياقتى وزەكتى ماسەلەلەردى قامتىدى.
بارلىق جۇمىستاردى قاراپ شىققان قازىلار القاسى جەڭىمپازداردى انىقتاپ، ولارعا ديپلومدار مەن اقشالاي سەرتيفيكاتتار تابىس ەتتى. جەڭىمپازداردى ماراپاتتاۋ ءراسىمىن ءدىن ىستەرى باسقارماسى باسشىسىنىڭ ورىنباسارى الىمبەك الىمبەك ۇلى وتكىزدى.
«Digital Art اياسىنداعى ۇزدىك فوتوجوبا» نوميناسياسىندا ادىلەت مىڭجاساروۆ جەڭىمپاز اتاندى.
«ۇزدىك ولەڭ» نوميناسياسىندا بايكون ديحان ماراپاتتالدى.
«ۇزدىك ۇران مەن ديەۆيز» نوميناسياسىندا اقمارجان ناقناۆينانىڭ ەڭبەگى ەرەكشەلەندى.
باۋىرجان بوتاقارايەۆ «ۇزدىك پىكىر» ءۇشىن ماراپاتقا يە بولدى.
«قازاق ءۇنى» گازەتى ورىس رەداكسياسىنىڭ رەداكتورى داستان ەلدەسوۆ «الەۋمەتتىك جەلىلەردەگى ۇزدىك تاقىرىپتىق پوست» نوميناسياسىنىڭ جەڭىمپازى اتاندى.
قازاق تىلىندەگى ينتەرنەت-رەسۋرستاعى ۇزدىك ماقالا اۆتورى اقمارال ماحامبەتالى، ال ورىس تىلىندەگى ينتەرنەت-رەسۋرستا ۇزدىك ماقالا نوميناسياسىن شىنار ابزەلبەك جەڭىپ الدى.
Instagram جەلىسىندەگى ۇزدىك بەينەروليك ءۇشىن بەكحان تاسبولات ماراپاتتالدى.
TikTok-تاعى ۇزدىك بەينەروليك ءۇشىن جانارىس ونايبايعا سىيلىق تابىستالدى.
ەڭ ۇزدىك الەۋمەتتىك روليكتىڭ اۆتورى ەرسۇلتان راحيمبەك بولدى.
جەڭىمپازدارعا بەرىلگەن جۇلدەلەردىڭ مولشەرى 50 000 تەڭگەدەن 350 000 تەڭگەگە دەيىن بولدى. بايقاۋدى ۇيىمداستىرۋشىلار قاتىسۋشىلارعا العىسىن ءبىلدىرىپ، اتالعان ءدىني اعارتۋ سالاسىنداعى ەڭبەكتىڭ ماڭىزدىلىعىن اتاپ ءوتتى. ولار جەڭىمپازداردىڭ جۇمىستارى حالىقتىڭ ءدىني ساۋاتتىلىعىن ارتتىرۋعا، دەسترۋكتيۆتى اعىمدارعا قارسى كۇرەسكە ۇلەس قوسقانىن ايتتى.
الماتىلىق نۇرگۇل اياپبەرگەنوۆا بايقاۋ تۋرالى Instagram جەلىسىنەن بىلگەن. ول شىعارماشىلىق جارىسقا قاتىسىپ، «ۇزدىك پوەزيا» نوميناسياسىندا جەڭىمپاز اتاندى.
– يدەيامدى ازىرلەۋگە شامامەن ءبىر جارىم اي كەتتى. «وياتۋ» («پروبۋجدەنيە») اتتى شىعارمامدا حالىقتى داستۇرلەردى ساقتاۋعا شاقىردىم. شىعارماشىلىعىمدا ادامدارعا ماڭگىلىك قۇندىلىقتاردى ەسكە سالعىم كەلدى. ءقازىر دەسترۋكتيۆتى باعىتتار وتە كوپ، سوندىقتان اقپاراتتىق-اعارتۋشىلىق جوبالاردى ءجيى وتكىزۋ قاجەت دەپ ويلايمىن. دۇرىس يدەيالاردى ناسيحاتتاۋ وتە ماڭىزدى، – دەپ اتاپ ءوتتى بايقاۋ قاتىسۋشىسى.