الماتىدا قامقور ازاماتتاردىڭ باستاماشىل توبىنىڭ قاتىسۋىمەن ديماش قۇدايبەرگەننىڭ قابىرعا سۋرەتىن قايتا قالپىنا كەلتىرۋ جۇمىستارى باستالدى.
2020 جىلى الماتىداعى سەيفۋللين مەن قابانباي باتىر كوشەلەرىنىڭ قيىلىسىنداعى ۇيگە ديماشتىڭ جانكۇيەرلەرى ونىڭ قۇرمەتىنە قابىرعا سۋرەتىن – مۋرالىن سالعان بولاتىن. مۋرالدى الماتىلىق سۋرەتشى باتىر ءسادۋاقاسوۆ سالدى.
ءۇش جىل بويى قالا تۇرعىندارى الەمگە ايگىلى قازاق بالاسىنىڭ بەينەسىنە تامسانىپ كەلگەن. الايدا سوڭعى ۋاقىتتا سۋرەت كومەسكى تارتىپ، ءتىپتى بۇلىنۋگە اينالعان.
وتكەن سەنبىدە ديماشتىڭ مۋرالىنىڭ ماڭىنا ادام كوپ جينالدى. باستاماشىل توپ، ديماشتىڭ فاناتتارى مەن قالا حالقىنىڭ كوز الدىندا سۋرەتشىلەر مۋرالدى قايتا وڭدەۋدى ديماشتىڭ ادەمى انىمەن باستادى.
سۋرەتشى ب.ءسادۋاقاسوۆ.
«جوبا ۇلكەن قيىندىقپەن جاسالدى. رەسمي ورگانداردان رۇقسات الۋ مەن قارجى تابۋ ءبىراز قولبايلاۋ بولدى. بۇدان بولەك، بوياۋعا، روليكتەرگە، مۇنارانى جالعا الۋعا، پروەكتورعا اقشا كەرەك. الماتىلىق كاسىپكەرلەردىڭ ءبىرى باستامانى قولداپ، الەمنىڭ 65 ەلىنە بەلگىلى قابىرعا سۋرەتىن جاساۋعا دەمەۋشىلىك ەتتى. ەڭ باستىسى، الماتى ديماشتىڭ سۋرەتى سالىنعان العاشقى قالا بولدى. وتكەن جىلدىڭ كۇزىندە اكىمدىك مۋرال سالىنعان ۇيگە جوندەۋ جۇمىستارىن جۇرگىزدى، ونىڭ بارىسىندا قابىرعا جابىنى ايتارلىقتاي بۇلىنگەن»، – دەيدى قابىرعا سۋرەتىن جاساۋعا باستاماشى بولعانداردىڭ ءبىرى ەرلان يبراگيم.
قالالىقتاردىڭ باستاماشىل توبى مۋرالدى قالپىنا كەلتىرۋگە قاراجات جيناپ، جوندەۋ جۇمىستارىن جۇرگىزۋگە قالا اكىمدىگىنىڭ كەلىسىمىن الدى.
وسىعان دەيىن الماتى قالاسىندا قابانباي باتىر مەن ساكەن سەيفۋللين كوشەلەرى قيىلىسىندا مۋرال سالىنعانىن ديماش قۇدايبەرگەننىڭ ءوزى دە Instagram پاراقشاسىندا جازعان.
«جەرلەستەردىڭ سىيلىعىن كورگەندە جۇرەگىمە جىلۋلىق ورناپ، ىشتەي راحمەتىمدى ايتقان بولاتىنمىن. الايدا ديماش قونايەۆتاي ۇلى تۇلعالارىمىز تۇرعاندا جاس بۋىن وكىلى ءوزىنىڭ الىپ سۋرەتى جايلى جار سالعانى ۇيات بولار دەدىم دە، ۇندەمەدىم. قازىرگى تاڭدا وسىنشا قيىن جۇمىسقا ەڭبەك ەتكەن ازاماتتارعا العىس ايتۋدى ءجون كورىپ وتىرمىن»،– دەپ جازدى ول.
سونداي-اق ديماش سۋرەتشىلەرگە دە بىلاي دەپ العىس ايتتى:«ءقادىرلى سۋرەتشىلەر، قولدارىڭىز دەرت كورمەسىن، تۋىندىلارىڭىز جەر شارىن شارلاپ، قازاقتىڭ اتىن بيىككە كوتەرسىن. جانە بارشا قولداۋشىلارىما شىن جۇرەكتەن العىس بىلدىرەمىن. كوپ راقمەت!»
مۋرال سالۋ باستاماسىن قولداعانداردىڭ ءبىرى – بروندى كولىك شىعاراتىن «قازاقستان پاراماۋنت ينجينيرينگ» كومپانياسىنىڭ نەگىزىن قالاۋشى، ەكونوميكالىق ۇلتشىلدىق قوزعالىسىنىڭ ليدەرى ايبەك بارىسىوۆ.
ءماجىلىس دەپۋتاتتىعىنا كانديدات ا.بارىسوۆ:«ءبىزدىڭ ديماش قۇدايبەرگەن – قازاق حالقىنىڭ، بارشا ەلىمىزدىڭ ماقتانىشى. ول قازاقستاننىڭ سيمۆولىنا اينالدى. ديماش ارقىلى ءقازىر ەلىمىزدى بۇكىل الەم بىلەدى. سوندىقتان مۇنداي مۋرالدار – ونىڭ شىعارماشىلىعىن ناسيحاتتاۋ، ونەرىن باعالاۋ جولىنداعى از عانا ۇلەسىمىز»، – دەدى.
ديماشتىڭ جانكۇيەرلەرىنىڭ ءبىرى، 72 جاستاعى استەرحان سارسەنبايەۆانىڭ قۋانىشىندا شەك جوق.
ديماشتىڭ جانكۇيەرى ا.سارسەنبايەۆا.
«ديماشتىڭ كونسەرتى قاي جەردە وتسە دە، بارۋعا تىرىسامىن. استاناداعى، دۋبايداعى كونسەرتتەرىندە بولدىم. ديماش مەن ءۇشىن اسا قىمبات جان، ول قازاقتىڭ اندەرىن الەمدىك ساحناعا الىپ شىقتى. سۇيىكتى ءانشىمىزدىڭ مۋرالىن قايتا جاساۋعا قول ۇشىن سوزعان ەرلان يبراگيمگە، ايبەك بارىسوۆقا، ەمينە قوجامۇراتوۆاعا العىسىم شەكسىز»، – دەدى ا.سارسەنبايەۆا.