تامىز ايىنىڭ سوڭىندا باستالعان «Digital Ustaz Almaty» اتتى پەداگوگتار اراسىنداعى جىل سايىنعى قالالىق كونكۋرستىڭ اياسىندا، بايقاۋ كەڭەسىنىڭ مۇشەلەرىنە كونكۋرستى ودان ءارى ىلگەرىلەتۋ بويىنشا اعىمداعى ناتيجەلەر مەن جوسپارلار تانىستىرىلدى، دەپ حابارلايدى almaty-akshamy.kz
وتىرىس بارىسىندا قالا اكىمى باقىتجان ساعىنتايەۆ، اسىرەسە، پاندەميا كەزىندە ءبىلىم بەرۋدىڭ جاڭا ستاندارتتارعا كوشۋىنىڭ ماڭىزدىلىعىن اتاپ ءوتتى: «الەمنىڭ كوپتەگەن ەلدەرىندە، سونىڭ ىشىندە قازاقستاندا سيفرلىق ءبىلىم بەرۋ سالاسىندا پەداگوگتەردىڭ تەك 50%-ى بازالىق كومپيۋتەرلىك ساۋاتتىلىقتى پايدالانادى. ال مۇعالىمدەردىڭ تەك 13%-ى سيفرلىق قۇزىرەتكە يە. سوندىقتان، وقۋ پروسەسىن زاماناۋي، قولجەتىمدى جانە، ەڭ باستىسى، بالالارعا تۇسىنىكتى ەتۋ ءۇشىن رەسپۋبليكانىڭ بارلىق مەكتەپتەرىندە ءبىلىم بەرۋدى ترانسفورماسيالاۋعا جول سالاتىن العاشقى «Digital Ustaz Almaty» قالالىق كونكۋرسى ۇيىمداستىرىلعان».
جوبانىڭ بىرلەسكەن ۇيىمداستىرۋشىسى، «EdCrunchAcademy» زاماناۋي ءبىلىم بەرۋدى دامىتۋ ينستيتۋتىنىڭ وكىلى نۇرلان قياسوۆ جۇرگىزىلگەن زەرتتەۋلەرگە سايكەس، مۇعالىمدەردىڭ كوپشىلىگى وقىتۋدىڭ ەسكىرگەن ادىستەرىن قولداناتىنىن راستادى.
«ءبىزدىڭ قاشىقتىقتان ءبىلىم بەرۋ ءادىسىمىز – تۇتىنۋشىعا مازمۇندى «جەدەل جەتكىزۋ» جۇيەسى بولىپ تابىلادى. وعان قوسا، وسى كۇنگە دەيىن تەك قازاقستاندا عانا ەمەس، تمد ەلدەرىندە دە وقۋ مەن اقپاراتتىڭ قول جەتىمدىلىگىنىڭ تەڭسىزدىگى بار. كونكۋرس حالىقارالىق ساراپشىلاردان سيفرلىق ءبىلىم بەرۋ سالاسىندا ءبىلىم بەرە وتىرىپ، بارلىق مۇعالىمدەردى بىرىكتىرۋگە باعىتتالعان. ناتيجەسىندە قالا ءار بالا ءۇشىن جاڭا ىنتالاندىرۋشى ورتا مەن مۇعالىمدەرگە ارنالعان 100 جاڭا ادىستەمەگە يە بولادى»، - دەپ اتاپ ءوتتى ساراپشى.
جوبانىڭ يدەياسىن كەڭەستىڭ تەڭ ءتوراعاسى، «نۇرسۇلتان نازاربايەۆتىڭ ءبىلىم بەرۋ قورى» قق ديرەكتورى دينارا كۋليبايەۆا دا قولداپ، Digital Ustaz Almaty كونكۋرسىن وتكىزۋ باستاماسى الماتى قالاسىنىڭ مۇعالىمدەرى ءۇشىن جاقسى ىنتالاندىرۋ بولاتىنىن اتاپ ءوتتى.
ەستەرىڭىزگە سالا كەتەيىك، بۇگىنگى تاڭدا تىركەلگەن ءبىر جارىم مىڭنان استام مەكتەپ پەداگوگتارى «Digital Ustaz Almaty» ءبىرىنشى قالالىق كونكۋرسىنىڭ اياسىندا حالىقارالىق ساراپشىلاردان ءبىلىم الۋدا. مەكتەپتە وقىتۋ پروسەسى بارىسىندا سيفرلىق تەحنولوگيالاردى قولدانۋدى تانىمال ەتۋگە باعىتتالعان كونكۋرس 3 كەزەڭدە وتەدى، ونىڭ بارىسىندا قاتىسۋعا ءوتىنىم بەرگەن 1-12 سىنىپ مۇعالىمدەرى سالا ماماندارىنىڭ ۆەبينارلارىن تىڭداپ، ءوز ماتەريالدارىن، ساباقتارى مەن شەبەرلىك سىنىپتارىن پىسىقتاپ، الەمنىڭ ۇزدىك ساراپشىلارىنان وقۋدان وتۋلەرى قاجەت.
«Digital Ustaz Almaty» شەڭبەرىندە پەداگوگتار SMM جانە بلوگينگ، سيفرلىق قاۋىپسىزدىك نەگىزدەرىن، ينفوگرافيكانى قۇرۋدى ۇيرەنەدى. كونتەنت-جوسپارلار قۇرۋ جانە مەديا ماتەريالدارمەن جۇمىس ىستەۋدەن باسقا، مۇعالىمدەرگە ىڭعايلى قوسىمشالار مەن قىزمەتتەر ۇسىنىلادى، ال وڭ تاجىريبەسى بار ارىپتەستەر كەڭەستەرىمەن ۆەبينارلاردا بولىسەدى.
كونكۋرسقا وتىنىمدەردى قابىلداۋدىڭ اياقتالۋىنا ەكى اپتادان از ۋاقىت قالدى – 1 قازان كۇنى «Digital Ustaz Almaty» قاتىسۋشىلارى اراسىندا ەكىنشى تۋرعا وتەتىن 100 ۇزدىك پەداگوگ ىرىكتەلەدى، وندا سيفرلىق قۇرالداردى پايدالانا وتىرىپ ساباق ازىرلەنەتىن بولادى. ال قاراشا ايىندا فينالعا فينلياندياعا تاعىلىمداماعا بارۋ ءۇشىن كۇرەسەتىن 30 ءمۇعالىم جىبەرىلەدى.
جوبا قازاقستان رەسپۋبليكاسى تاۋەلسىزدىگىنىڭ 30 جىلدىعىنا ورايلاستىرىلعان جانە قازاقستان رەسپۋبليكاسى ءبىلىم جانە عىلىم مينيسترلىگىنىڭ قولداۋىمەن، الماتى قالاسى اكىمدىگىنىڭ، «نۇرسۇلتان نازاربايەۆتىڭ ءبىلىم بەرۋ قورى» قق، «EdCrunchAcademy» زاماناۋي ءبىلىم بەرۋ ينستيتۋتىنىڭ ۇيىمداستىرۋىمەن وتكىزىلگەن. باس سەرىكتەس «الماتى كىتاپ» باسپاسى بولدى.
بايقاۋ كەڭەسىنىڭ قۇرامىنا الماتى قالاسى اكىمدىگىنىڭ، ق ر ءبىلىم جانە عىلىم مينيسترلىگىنىڭ وكىلدەرى، ق ر پارلامەنتى ءماجىلىسىنىڭ، الماتى قالاسى ءماسليحاتىنىڭ دەپۋتاتتارى، سونداي-اق ەڭبەك سىڭىرگەن پەداگوگتار مەن ءبىلىم بەرۋ مەكەمەلەرىنىڭ وكىلدەرى كىردى.
«Digital Ustaz Almaty» بايقاۋ كەڭەسىنىڭ قۇرامى
كەڭەس ءتوراعاسى، الماتى قالاسىنىڭ اكىمى باقىتجان ساعىنتايەۆ،
كەڭەستىڭ تەڭ ءتوراعاسى، «نۇرسۇلتان نازاربايەۆتىڭ ءبىلىم بەرۋ قورى» قق ديرەكتورى دينارا كۋليبايەۆا،
قازاقستان رەسپۋبليكاسى ءبىلىم جانە عىلىم ۆيسە-مينيسترى بيبىگۇل اسىلوۆا،
الماتى قالاسى اكىمىنىڭ ورىنباسارى ەرجان باباقۇماروۆ،
الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا،
«ءسابي» قق پرەزيدەنتى، ش. ءۋاليحانوۆ اتىنداعى مەكتەپتىڭ قۇرىلتايشىسى اسەل تاسماعامبەتوۆا،
TanmediaGroup ديرەكتورلار كەڭەسىنىڭ ءتوراعاسى، الماتى قالاسى ءماسليحاتىنىڭ دەپۋتاتى ارمانجان بايتاسوۆ،
«الماتى كىتاپ» باسپاسى ديرەكتورلار كەڭەسىنىڭ ءتوراعاسى ەلەونورا باتالوۆا،
اباي اتىنداعى قازۇپۋ رەكتورى دارحان بءىلءالوۆ،
قازاقستان رەسپۋبليكاسى پارلامەنتى ءماجىلىسىنىڭ دەپۋتاتى يرينا سميرنوۆا،
الماتى قالاسى №47 مەكتەپ ءمۇعالىمى، بلوگەر سۇلتان سءۇلەيەۆ،
قازاقستان رەسپۋبليكاسى پارلامەنتى ءماجىلىسىنىڭ دەپۋتاتى جۇلدىز سءۇلەيمەنوۆا،
حيميا ءپانىنىڭ ءمۇعالىمى، ForbesKazakhstan «30 مولوجە 30» رەيتينگىنىڭ قاتىسۋشىسى ۇلان ءۇسەنوۆ،
الماتى جىل ءمۇعالىمى-2020، № 133 جوببم باستاۋىش سىنىپ ءمۇعالىمى ماقپال چۋكەيەۆا.