بەرەكەلى كۇزدە الماتى مەن الماتى وبلىسىنىڭ فەرمەرلەرى دەمالىس كۇنگى جارمەڭكەلەردە جاڭا پىسكەن بالعىن ونىمدەر ۇسىنىپ كەلەدى.
سوڭعى ۋاقىتتا جارمەڭكەلەرگە كەلۋشىلەر سانى 10% ارتىپ، بۇگىندە اپتاسىنا 50 مىڭ ادامعا دەيىن جەتىپ وتىر، - دەپ حابارلايدى Aqshamnews.kz.
بۇعان جەتىسۋ اۋدانىندا اشىلعان جاڭا جارمەڭكە دە ىقپال ەتتى. ءقازىر مۇنداي ساۋدا ورىندارى المالى، بوستاندىق، اۋەزوۆ، مەدەۋ جانە جەتىسۋ اۋداندارىندا تۇراقتى تۇردە ۇيىمداستىرىلىپ كەلەدى. ءىس-شارانى «الماتى» الەۋمەتتىك-كاسىپكەرلىك كورپوراسياسى ۇيىمداستىرعان.
جىل باسىنان بەرى جارمەڭكەلەرگە قاتىساتىن فەرمەرلەر مەن اۋىل شارۋاشىلىعى وندىرۋشىلەرىنىڭ سانى 10% كوبەيىپ، بۇگىندە 330 كاسىپ يەسىنە جەتتى. ولار تۇتىنۋشىلارعا مىڭنان استام ءتۇرلى تاۋار ۇسىنادى. بارلىق ءونىم دەلدالسىز، ياعني تىكەلەي وندىرۋشىلەر مەن وڭدەۋ كاسىپورىندارىنان جەتكىزىلەدى. بۇل ءوز كەزەگىندە باعانىڭ نارىقتاعى دەڭگەيدەن تومەن بولۋىنا سەپتىگىن تيزىگىپ وتىر.
تۇرعىندار سۇرانىسىنىڭ ارتۋىنا بايلانىستى «الماتى» اكك كەلەسى اپتادا المالى اۋدانىندا جاڭا جارمەڭكە اشۋدى جوسپارلاپ وتىر. وتەتىن ورنى جايلى قوسىمشا اقپارات كەيىنىرەك حابارلانادى.
جارمەڭكەلەر ءار سەنبى جانە جەكسەنبى كۇندەرى ساعات 09:00-دەن 18:00-گە دەيىن مىنا مەكەنجايلاردا وتەدى:
* المالى اۋدانى – ماسانچي كوشەسى، گوگول جانە ايتەكە بي كوشەلەرىنىڭ اراسى؛
* بوستاندىق اۋدانى – قازاقفيلم شاعىناۋدانى، يسينالييەۆ كوشەسى؛
* اۋەزوۆ اۋدانى – وتەگەن باتىر كوشەسى، اباي داڭعىلىنان تومەن؛
* مەدەۋ اۋدانى – مەندىقۇلوۆ بۋلۆارى، بەكتۇروۆ كوشەسىنىڭ قيىلىسى؛
* جەتىسۋ اۋدانى – قۇلاگەر شاعىناۋدانى، سەرىكوۆ كوشەسى، 2ء-ۇي.
جاڭا ونىمدەر جارمەڭكەلەردە عانا ەمەس، قالاداعى ءىرى ساۋدا جەلىلەرىندە دە قولجەتىمدى باعامەن ساتىلادى. «بەرەكە Fest» رەسپۋبليكالىق اكسياسى اياسىندا وتاندىق وندىرۋشىلەرگە ارنايى ساۋدا ايماقتارى ءبولىندى. بۇل شارا ونىمدەردى تومەندەتىلگەن باعامەن ساتۋعا، وتاندىق ءوندىرىستى قولداۋعا جانە الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋعا مۇمكىندىك بەرەدى.
اكسيا اياسىندا الماتى قالاسىنىڭ كاسىپكەرلىك جانە ينۆەستيسيالار باسقارماسى، «الماتى» اكك جانە Magnum، Small، Toimart ساۋدا جەلىلەرى اراسىندا ىنتىماقتاستىق تۋرالى مەموراندۋمدارعا قول قويىلدى. قۇجاتتار بويىنشا الەۋمەتتىك ماڭىزى بار ازىق-تۇلىك تاۋارلارىنا ساۋدا ۇستەمەسى 10 پايىزدان اسپايدى. «بەرەكە Fest» اكسياسى بيىل قازان ايىنىڭ سوڭىنا دەيىن جالعاسادى.