الماتىدا ءبىرمانداتتى اۋماقتىق سايلاۋ وكرۋگىنەن شىعىپ قالعان ءماسليحات دەپۋتاتتارىنىڭ ورنىنا قالالىق ءماسليحاتى دەپۋتاتىنا سايلاۋ باستالدى، دەپ حابارلايدى Almaty-akshamy.kz
ۋچاسكەلەر تاڭعى ساعات 7.00-دە جۇمىس ىستەي باستادى. وكىنىشكە وراي، بۇگىنگى سايلاۋ ەل تاريحىندا ءبىرىنشى رەت ازا تۇتۋ كۇنىنە تۇسپا-تۇس كەلدى. سوندىقتان بارلىق عيماراتتا كوك بايراعىمىز ءتۇسىرىلدى.
№82 جانە №85 ۋچاسكەلەرىندە سايلاۋ ەل انۇرانىمەن اشىلدى.
- ءبىزدىڭ سايلاۋ ۋچاسكەمىز ءجۇز پايىز دايىن، قالا تۇرعىندارىنىڭ ەش كەدەرگىسىز داۋىس بەرۋىنە بارلىق جاعداي جاسالعان. ءبىز بۇل ناۋقاندا، اسىرەسە، جاستار بەلسەندىلىك تانىتادى دەپ ويلايمىز. بىزدە سايلاۋ پروسەسىنە العاش رەت قاتىساتىن 34 جاس بار، - دەيدى №82 ۋچاسكەلىك سايلاۋ كوميسسياسىنىڭ ءتوراعاسى ۆيكتوريا مۋستايەۆا.
بارلىق سايلاۋ ۋچاسكەسىندە دە حالىقتىڭ بارلىق توبىنا قولايلى بولۋ ءۇشىن ەرەكشە نازار اۋدارىلعان. مىسالى، كوزى ناشار كورەتىن ازاماتتار ءۇشىن كانديداتتاردىڭ ءومىرباياندىق دەرەكتەرى بار اۋديوروليكتەر دايىندالدى.
- قاۋلىعا سايكەس ءبىز قاجەتتى جاعدايلاردى جاسادىق. بۇل قۇلاققاپتار، ستەند، كومپيۋتەر، لۋپالار، ارنايى ترافارەتتەر، – دەيدى بۇگىنگى ناۋقان تۋرالى ويىن بولىسكەن №85 سايلاۋ ۋچاسكەسىنىڭ سايلاۋ كوميسسياسىنىڭ ءتوراعاسى ارداق سماعۇلوۆا.
جالپى، ەلدە 2 وبلىستىق دەپۋتات، 7 قالالىق دەپۋتات جانە 12 اۋداندىق ءماسليحاتتار دەپۋتاتتارى سايلانادى.