ناۋقاستىڭ اناسى اۋرۋحانا ماماندارىنا العىسىن ايتتى
الماتىلىق دارىگەرلەر جول اپاتىنان كەيىن كوماعا تۇسكەن 35 جاستاعى جۇكتى ايەلدى امان الىپ قالدى، دەپ حابارلايدى Almaty-akshamy.kz.
الماتىداعى № 1 قالالىق كلينيكالىق اۋرۋحانانىڭ باسپا ءسوز قىزمەتىنەن ءمالىم ەتكەندەي، 35 جاستاعى الماتىلىق كەلىنشەك 2022 جىلدىڭ ءبىرىنشى جەلتوقسانىندا 19 اپتالىق جۇكتىلىك مەرزىمى كەزىندە باسقا ەمدەۋ مەكەمەسىنەن اۋىستىرىلدى.
«№ 1 قالالىق كلينيكالىق اۋرۋحاناسىنا اۋىستىرىلدى جانە ونىڭ جاعدايى باسسۇيەك-مي جاراقاتى مەن ورتالىق جۇيكە جۇيەسىنىڭ زاقىمدالۋىنا بايلانىستى وتە اۋىر دەپ باعالاندى. تىنىس الۋ فۋنكسيالارىنىڭ بۇزىلۋى، باۋىر جەتكىلىكسىزدىگىمەن جانە ءزار شىعارۋ جۇيەسىنىڭ زاقىمدالۋىمەن بىرگە قۇتقارۋ مۇمكىندىگى از بولدى»، - دەيدى دارىگەرلەر.
اتالعان مەديسينالىق مەكەمەدە ءۇش اي بويى ەم العان پاسيەنت ءارتۇرلى بەيىندەگى مامانداردىڭ كوپسالالى توبىنىڭ مۇقيات باقىلاۋىندا بولدى.
№ 1 اۋرۋحانادا جۇمىس ىستەيتىن قازاقستان-كورەيا وڭالتۋ مەديسيناسى ورتالىعىنىڭ بازاسىندا وڭتۇستىك كورەيانىڭ چحيلگوك اۋرۋحاناسىنىڭ كەنبۋگا ۋنيۆەرسيتەتىنىڭ وڭالتۋ سالاسىنداعى ماماندارى مەن پروفەسسورلار قۇرامىمەن تەلەمەديسينا سەسسيالارى وتكىزىلگەن.
ونىڭ بارىسىندا قالپىنا كەلتىرۋ ءىس-شارالارىنىڭ ءتاسىلى جانە وسى پاسيەنت ءۇشىن وڭالتۋ پەرسپەكتيۆالارى تالقىلاندى.
«دارىگەرلەردىڭ كۇش-جىگەرىنىڭ ارقاسىندا وڭالتۋدىڭ ايتارلىقتاي ناتيجەلەرىنە قول جەتكىزىلدى: كوپتەگەن ورگانداردىڭ جەتكىلىكسىزدىگىنىڭ بارلىق بەلگىلەرى توقتاتىلدى، پاسيەنت وزدىگىنەن تىنىس الادى، تاماقتانادى، سويلەيتىن بولدى، اياق-قول جانە قوزعالىس فۋنكسيالارىن قالپىنا كەلدى. جاعدايدىڭ كۇردەلىلىگىن، پاسيەنتتىڭ جاعدايىن ەسكەرە وتىرىپ، № 1 مكب ەمدەۋ شىعىندارىنىڭ كوپ بولىگىن ءوز موينىنا الدى»،- دەپ اتاپ ءوتتى ەمدەۋ مەكەمەسىنىڭ باسپا ءسوز قىزمەتى.
ناۋقاستىڭ اناسى اۋرۋحانا ماماندارىنا العىسىن ايتتى.
«ۇزاق ەمدەۋدەن كەيىن قىزىم جاقسارىپ، اينالاسىنداعىلارعا جاۋاپ بەرە باستاعاندا، قاتتى قۋاندىم. اۋەلى قۇدايعا، سوسىن № 1 اۋرۋحانانىڭ بارلىق مەديسينالىق قىزمەتكەرلەرىنە، قالالىق قوعامدىق دەنساۋلىق ساقتاۋ باسقارماسىنا العىسىمدى ايتامىن. وسىنداي ءوز ءىسىن بىلەتىن مامانداردىڭ ارقاسىندا ول ەكىنشى رەت ومىرگە كەلدى. ال ونىڭ دۇنيەگە ەندى كەلەتىن ءسابيى ءومىر سۇرۋگە مۇمكىندىك الدى»، - دەپ اعىنان جارىلدى ناۋقاستىڭ اناسى.