الماتىداعى اكۋشەريا، گينەكولوگيا جانە پەريناتولوگيا عىلىمي ورتالىعىنىڭ ماماندارى كۇردەلى مەديسينالىق جاعدايداعى جۇكتى ايەلدى ءساتتى بوساندىرىپ الدى.
35 اپتا مەرزىمدە تۇسكەن ناۋقاسقا يديوپاتيالىق اپلاستيكالىق انەميا (حاگەمان سيندرومى)، كواگۋلوپاتيا، تۇراقتى يممۋنوسۋپرەسسيۆتى تەراپيا قاجەتتىلىگى بار سوزىلمالى ترانسفۋزيالىق تاۋەلدىلىك سياقتى اۋىر دياگنوزدار قويىلدى، دەپ حابارلايدى aqshamnews.kz.
دارىگەرلەردىڭ ايتۋىنشا، انانىڭ جاعدايى مەن جۇكتىلىكتىڭ سوڭعى تريمەسترىندە تۋىنداعان اسقىنۋلار ومىرگە ءقاۋىپ ءتوندىردى. نەگىزگى قاۋىپتەر — بوسانۋ كەزىندە جاپپاي قان كەتۋ، ترومبوز، ۇرىق گيپوكسياسى جانە انانىڭ يممۋندىق تۇراقسىزدىعى بولدى.
ماماندار كونسيليۋم وتكىزىپ، انا مەن بالانىڭ ءومىرىن ساقتاپ قالۋ ءۇشىن بوسانۋدى مەرزىمىنەن بۇرىن يندۋكسيالاۋ تۋرالى شەشىم قابىلدادى.
ناتيجەسىندە، دارىگەرلەردىڭ ۇيلەسىمدى جۇمىسىنىڭ ارقاسىندا بوسانۋ شتاتتىق رەجيمدە ءوتتى. سالماعى 2885 گرامم، بويى 51 سم، اپگار شكالاسى بويىنشا 6/8 بالل العان ءسابي دۇنيەگە كەلدى.
بوسانعاننان كەيىن اناعا ارنايى ەمدەۋ جۇرگىزىلدى: ترانسفۋزيالىق تەراپيا، انەميانى تۇزەتۋ جانە ترومبوزدىڭ الدىن الۋ شارالارى قابىلداندى.
قازىرگى ۋاقىتتا انا مەن بالا قاناعاتتانارلىق جاعدايدا. پاسيەنت گەماتولوگتىڭ باقىلاۋىندا بولىپ، قولداۋ تەراپياسىن جالعاستىرادى.
مەديسينالىق ورتالىق ماماندارى بۇل وقيعانى ەرەكشە جاعداي دەپ اتاپ، كوپسالالى بىلىكتى كوماندانىڭ ۇيلەسىمدى ارەكەتى ءومىر مەن دەنساۋلىق ءۇشىن شەشۋشى ءرول اتقارعانىن ايتتى.