الماتىدا دارىگەردى اتىپ ولتىرگەن كۇدىكتىنىڭ ىسىنە تاعى ءبىر قىلمىستىق باپ قوسىلدى. وعان يۋريي شۋمكوۆتى ولتىرەمىن دەپ قورقىتتى دەگەن ايىپ تاعىلىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قاماۋعا الىنعان كۇدىكتىگە قاتىستى تاعى ءبىر باپ قوسىلدى. ءقازىر ق ر قىلمىستىق كودەكسىنىڭ 115-بابى (ادام ولتىرەمىن نەمەسە دەنساۋلىققا اۋىر زيان كەلتىرەمىن دەپ قورقىتۋ، سول سياقتى ادامعا قاتىستى وزگە دە اۋىر كۇش قولدانۋ) بويىنشا سوتقا دەيىنگى تەرگەۋ باستالدى» ، - دەپ حابارلادى قالالىق پروكۋراتۋرانىڭ باسپا ءسوز قىزمەتى.
وقيعا بولعان كۇنى بوستاندىق اۋداندىق پوليسيا باسقارماسى سوتقا دەيىنگى تەرگەۋدى باستاعان بولاتىن. قوزعالعان قىلمىستىق ىستەر بىرىكتىرىلدى. ءقازىر ول الماتى قالالىق پوليسيا دەپارتامەنتى جەدەل-تەرگەۋ توبىنىڭ وندىرىسىندە. قىلمىستىق ءىستىڭ سەبەبى مەن باسقا دا ءمان-جايلارىن انىقتاۋعا، سونداي-اق تولىقتىعىن قامتاماسىز ەتۋگە باعىتتالعان قاجەتتى تەرگەۋ ارەكەتتەرى جۇرگىزىلىپ جاتىر.
«قىلمىستىق ءىس بويىنشا پروسەسسۋالدىق پروكۋرور تاعايىندالىپ، وعان ق ر قىلمىستىق-پروسەستىك كودەكسىنىڭ 197-بابىنا سايكەس جازباشا نۇسقاۋ بەرىلدى» ، - دەپ اتاپ ءوتتى ۆەدومستۆادان.
ەسكە سالايىق، 4 ءساۋىر كۇنى الماتىدا بەلگىلى گاستروەنتەرولوگ يۋريي شۋمكوۆتى پاسيەنتى بولعان ادام اڭ اۋلايتىن قارۋدان اتىپ ءولتىردى. كەيىن دەنساۋلىق ساقتاۋ ءمينيسترى اجار عينيات دارىگەردىڭ ولىمىنە قاتىستى پىكىر ءبىلدىردى. دارىگەردىڭ ارتىندا، جۇبايى، ءۇش بالاسى مەن قارت اتا-اناسى قالدى.