الماتىدا ورتالىق ازيا جانە اۋعانستان ءۇشىن بۇۇ-نىڭ ورنىقتى دامۋ ماقساتتارى جونىندەگى وڭىرلىك ورتالىعىن اشاتىن ۋاقىت كەلدى. بۇل تۋرالى بىرىككەن ۇلتتار ۇيىمى باس اسسامبلەياسىنىڭ 78-سەسسياسىندا سويلەگەن سوزىندە پرەزيدەنت قاسىم-جومارت توقايەۆ ايتتى، دەپ حابارلايدى Almaty-akshamy.kz.
«ءبىزدىڭ ايماقتىڭ كۇن تارتىبىندەگى ەڭ وزەكتى ماسەلە – اۋعانستان. ول تۇراقتى، وركەندەگەن مەملەكەتكە جانە سەنىمدى ساۋدا سەرىكتەسىنە اينالۋى كەرەك. وسى ورايدا الماتىدا ورتالىق ازيا جانە اۋعانستان ءۇشىن بۇۇ-نىڭ ورنىقتى دامۋ ماقساتتارى جونىندەگى وڭىرلىك ورتالىعىن اشاتىن ۋاقىت كەلدى. بۇۇ-عا مۇشە مەملەكەتتەردىڭ بارلىعىن ءبىزدىڭ وسى باستامامىزدى قولداۋعا شاقىرامىن»، - دەدى پرەزيدەنت.
سونداي-اق قاسىم-جومارت توقايەۆ قازاقستان ورتالىق ازيا ەلدەرىمەن كوپجاقتى ىنتىماقتاستى ودان ءارى نىعايتۋعا نيەتتى ەكەنىن اتاپ ءوتتى.
«ءبىزدىڭ ايماق حالىقارالىق قاۋىمداستىقتىڭ «ءبىرتۇتاس ءارى دەربەس» بولىگى رەتىندە ماڭىزدى ءرول اتقارادى. سونداي-اق دامۋدىڭ جاھاندىق پروسەستەرىنە ءوز ۇلەسىن قوسا الادى. باقىتىمىزعا وراي، ەكونوميكالىق بەلسەندىلىك ارتىپ كەلەدى. سوڭعى 5 جىلدا ءوڭىر ىشىندەگى تاۋار اينالىمى ەكى ەسە ءوسىپ، 10 ميلليارد دوللاردى قۇرادى»، - دەپ ناتيجەلەرگە توقتالدى مەملەكەت باسشىسى.