توقايەۆ بۇۇ-عا مۇشە-مەملەكەتتەردىڭ بارلىعىن وسى باستامانى قولداۋعا شاقىردى.
مەملەكەت باسشىسى بۇۇ باس اسسامبلەياسى 78-سەسسياسىنىڭ جالپى دەباتىندا سويلەگەن سوزىندە وسىلاي دەدى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
الماتىدا ورتالىق ازيا جانە اۋعانستان ءۇشىن بۇۇ-نىڭ ورنىقتى دامۋ ماقساتتارى جونىندەگى وڭىرلىك ورتالىعىن اشۋ جوسپارى بار. بۇل تۋرالى مەملەكەت باسشىسى بۇۇ باس اسسامبلەياسى 78-سەسسياسىنىڭ جالپى دەباتىندا سويلەگەن سوزىندە ايتتى.
«قازاقستان ورتالىق ازيا ەلدەرىمەن كوپجاقتى ىنتىماقتاستى ودان ءارى نىعايتۋعا نيەتتى. ءبىزدىڭ ايماق حالىقارالىق قاۋىمداستىقتىڭ «ءبىرتۇتاس ءارى دەربەس» بولىگى رەتىندە ماڭىزدى ءرول اتقارادى. سونداي-اق دامۋدىڭ جاھاندىق پروسەستەرىنە ءوز ۇلەسىن قوسا الادى. باقىتىمىزعا وراي، ەكونوميكالىق بەلسەندىلىك ارتىپ كەلەدى. سوڭعى بەس جىلدا ءوڭىر ىشىندەگى تاۋار اينالىمى ەكى ەسە ءوسىپ، 10 ميلليارد اقش دوللارىن قۇرادى. ءبىزدىڭ ايماقتىڭ كۇن تارتىبىندەگى ەڭ وزەكتى ماسەلە – اۋعانستان. ول تۇراقتى، وركەندەگەن مەملەكەتكە جانە سەنىمدى ساۋدا سەرىكتەسىنە اينالۋى كەرەك. وسى ورايدا الماتىدا ورتالىق ازيا جانە اۋعانستان ءۇشىن بۇۇ-نىڭ ورنىقتى دامۋ ماقساتتارى جونىندەگى وڭىرلىك ورتالىعىن اشاتىن ۋاقىت كەلدى. بۇۇ-عا مۇشە-مەملەكەتتەردىڭ بارلىعىن ءبىزدىڭ وسى باستامامىزدى قولداۋعا شاقىرامىن»، - دەدى قاسىم-جومارت توقايەۆ.