الماتى قالاسىندا «ۋنيفاي امبەباپ جەكپە-جەك» تۇرىنەن جاسوسپىرىمدەر مەن جاستار اراسىندا اۋعان سوعىسىنىڭ ارداگەرى، پولكوۆنيك بوريس توكەن ۇلى كەرىمبايەۆتى (قارا-مايور) ەسكە الۋعا ارنالعان رەسپۋبليكالىق تۋرنير ءوتتى.
امبەباپ جەكپە-جەكتەن ۇيىمداستىرىلعان تۋرنير - اۋعان سوعىسى ارداگەرى بوريس توكەن ۇلىنىڭ قۇرمەتىنە وتكىزىلىپ وتىرعان العاشقى جارىس. باتىرىمىز اسكەري قىزمەتكە ءومىرىنىڭ 35 جىلدان استام ۋاقىتىن بەردى. ونىڭ ەڭ قيىن، ءارى جاۋاپتى كەزەڭى اۋعانستاندا ءوتتى.
ول الماتى وبلىسىنىڭ قاپشاعاي قالاسىنداعى 22ء-شى ارنايى ماقساتتاعى قۇراما بازاسىندا ۇيىمداستىرىلعان 177ء-شى ارنايى ماقساتتاعى جاساقتى باسقاردى. بۇل قۇرىلىم نەگىزىنەن قىرعىزداردان، قازاقتاردان، وزبەكتەردەن جانە تاجىكتەردەن قۇرالعان سوڭ «مۇسىلمان باتالونى» دەپ اتالاتىن.
اۋعان سوعىسىنىڭ ارداگەرى، حالىق اراسىندا «قارا مايور» اتانىپ كەتكەن ايگىلى پولكوۆنيك بوريس توكەن ۇلى كەرىمبايەۆتى ەسكە الۋ ءتۋرنيرى الماتىداعى №4 مامانداندىرىلعان بالالار مەن جاسوسپىرىمدەر سپورت مەكتەبىندە ءوتتى. سپورتتىق ءىس-شارانىڭ اشىلۋ سالتاناتىنا اۋعان سوعىسىنىڭ ارداگەرلەرى، قوعام قايراتكەرلەرى جانە بۇكىل الەمدىك سايىستاردى ەلىمىزدىڭ كوك تۋىن كوتەرىپ جۇرگەن سپورتشىلار قاتىستى.
وسى ورايدا، العاشقى قۇتتىق ءسوزى قازاقستان رەسپۋبليكاسىنىڭ ارداگەرلەر قاۋىمداستىعىنىڭ ءتوراعاسى، «ۋنيفاي امبەبەپ جەكپە-جەك» فەدەراسياسىنىڭ پرەزيدەنتى باحىتبەك سماعۇلعا بەرىلدى:
«كەڭەس اسكەرلەرىنىڭ اۋعان جەرىنەن شىعارىلعانىنا 35 جىل تولۋىن ەلىمىزدە اتاپ وتۋدە. وسى ورايدا، سپورتتىق ءىس شارا اۋعان سوعىسىنىڭ قاھارمانى، ق ر قارۋلى كۇشتەرىنىڭ اياققا تۇرۋىنا ۇلكەن ەڭبەك سىڭىرگەن قولباسشى بوريس توكەن ۇلىنىڭ قۇرمەتىنە ۇيىمداستىرىلىپ وتىر.اشىلۋ سالتاناتىنا قارا مويوردىڭ جاساعى، بىرگە قىزمەت ەتكەن ارداگەرلەر قاتىستى. ارداگەرلەر مەن سپورتشىلاردى ارنايى ماراپاتتاۋ ءراسىمى ءوتتى. سايىستى وتكىزۋدەگى باستى ماقساتىمىز داڭقتى باتىرىمىزدىڭ جاساعان ەرلىگىن ۇرپاققا ونەگە ەتىپ، ناسيحاتتاۋ بولىپ وتىر. سونىمەن قاتار، جاستاردىڭ اراسىندا سالاۋاتتى ءومىر سالتىن قالىپتاستىرىپ، ەلىنە دەگەن ماحابباتىرىن ارتتىرۋ»، – دەدى ب.سماعۇل.
سپورتتىق ءىس شارا بارىسىندا ارداگەرلەر مەن الەم چەمپيوندارى جانە سپورت شەبەرلەرى بوريس كەرىمبايەۆ اتىنداعى «ار-نامىس» توسبەلگىسىمەن ماراپاتتالدى. جالپى جارىسقا ەلىمىزدىڭ 7 وڭىرىنەن 270 استام سپورتشى قاتىستى. سايىس ەرەجەسى بويىنشا 10-18 جاس اراسىنداعى سپورتشىلار ءوز اراسىندا شىن مىقتىنى انىقتادى. جارىس جەڭىمپازدارى ارنايى، باعالى سىيلىقتارمەن ماراپاتتالدى.
