الماتىدا بولات ايۋحانوۆقا مەموريالدى تاقتا ورناتىلدى

الماتىدا قازكسر حالىق ءارتىسى، مەملەكەتتىك سىيلىقتىڭ يەگەرى بولات ايۋحانوۆقا مەموريالدى تاقتا ورناتىلدى.

سالتاناتتى شاراعا ونەر مايتالمانىنىڭ جارى رايحان ەسنازار قىزى، تۋىستارى، شاكىرتتەرى مەن ارىپتەستەرى قاتىستى، دەپ حابارلايدى Almaty-akshamy.kz.

بولات عازيز ۇلى ماسكەۋ تەاتر ونەرى ينستيتۋتىنىڭ بالەتمەيستەرلىك فاكۋلتەتىن ءتامامداعان. 1965 جىلعا دەيىن اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا بالەت ءارتىسى بولدى.

كەيىن «قازاقكونسەرتتە» سوليست، كوركەمدىك جەتەكشى قىزمەتىن اتقاردى. 1991 جىلدان باستاپ قازاق مەملەكەتتىك كلاسسيكالىق بي ءانسامبلىنىڭ كوركەمدىك جەتەكشىسى، 2003 جىلدان بەرى مەملەكەتتىك اكادەميالىق بي تەاترىنىڭ ديرەكتورى لاۋازىمىن اتقارعان ەدى. 100-دەن اسا رەسەنزيا، ماقالا، سۇحباتتىڭ اۆتورى. قازاق، ورىس، تۇرىك، ليتۆا، اعىلشىن جانە ۋكراين تىلدەرىن بىلگەن. ايۋحانوۆ بىلتىر 85 جاسىندا قايتىس بولدى.

«بولات عازيز ۇلى تەك قانا بالەتمەيستەر ەمەس، جالپى جازۋشى، اقىن، دراماتۋرگ. ازامات رەتىندە دە سونداي ءادىل، ادال، بارلىق نارسەنى تىكە ايتاتىن كەرەمەت تۇلعا بولدى. بالەت ونەرىنىڭ عانا كەرەمەت وكىلى ەمەس، جالپى قازاق رۋحانياتىنىڭ كەرەمەت تۇلعاسى. جانە قازاقتى الەمگە تانىتقان بىردەن-بىر سيرەك تۇلعانىڭ ءبىرى»، - دەيدى  جازۋشى، قازاقستاننىڭ ەڭبەك سىڭىرگەن قايراتكەرى ماعيرا قوجاحمەتوۆا.