دۇكەندەرگە ءتۇسىپ، ۇرلىق جاساپ جۇرگەن باۋكەسپەلەر قۇرىقتالدى
الماتىدا بىرنەشە ۇرلىق جاسادى دەگەن كۇدىكپەن ەكى ۇرى ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
المالى اۋداندىق پوليسيا باسقارماسى كپب قىزمەتكەرلەرى جەدەل ىزدەستىرۋ ءىس-شارالارى بارىسىندا 24 جاستاعى ەلوردالىق پەن 23 جاستاعى پاۆلودارلىق ۇستادى. سەزىكتىلەر بىرنەشە ۇرلىق جاسادى دەپ كۇدىكتەلۋدە.
ولار نەگىزىنەن دۇكەندەرگە ءتۇسۋدى كاسىپ قىلعان. دۇكەندەردىڭ كىرە بەرىس ەسىگىنىڭ كىلتىن تاڭداپ اشۋ ارقىلى ىشىنە كىرگەن. ۇرىلار نەعۇرلىم قۇندى زاتتاردى الىپ كەتۋگە تىرىسقانمەن، نەگىزىنەن اقشاعا باسىمدىق بەرگەن. 23 قىركۇيەك كۇنى ولار روزىباكييەۆ كوشەسىندە ورنالاسقان دۇكەندەردىڭ بىرىنە قۇلىپ كىلتىن تاڭداۋ ارقىلى اشىپ كىرىپ، 65 000 مىڭ تەڭگەنى جىمقىرعان.
«ۇستالعانداردىڭ تەرگەۋ الدىنداعى تەكسەرۋ كەزىندە المالى اۋدانىنىڭ اۋماعىندا وسىعان ۇقساس ۇرلىقتىڭ 7 ەپيزودىنا قاتىسى انىقتالدى. كۇدىكتىلەر ۇرلىققا قاتىسى بار ەكەندىگىن جوققا شىعارمايدى. بۇل فاكت ق ر قك-نىڭ 188-بابىنىڭ 3-بولىگى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە ەنگىزىلگەن»، – دەدى المالى اۋداندىق پوليسيا باسقارماسىنىڭ باستىعى ەسەن ىسقاقوۆ.
بەلگىلى بولعانداي، س.ەسىمدى ازامات بۇعان دەيىن دە ءىستى بولىپ، وسىنداي قىلمىسى ءۇشىن جازاسىن وتەگەن. پوليسيا “دۋەتتىڭ” قالانىڭ باسقا اۋداندارىندا دا وسىعان ۇقساس قىلمىستارعا قاتىسى بار-جوعىن تەكسەرەدى. ءقازىر ۇستالعانداردىڭ ەكەۋى دە ۋاقىتشا ۇستاۋ يزولياتورىندا. ءتارتىپ ساقشىلارى بارلىق قاجەتتى تەرگەۋ امالدارىن جۇرگىزۋدە.