جارمەڭكە كۇنى قالا تۇرعىندارى مەن قوناقتارىنا 420 توننا ءونىم ۇسىنىلادى، دەپ حابارلايدى aqshamnews.kz
2025 جىلى 4-5 قازاندا الماتىدا الماتى وبلىسىنىڭ تاۋار وندىرۋشىلەرى مەن قالا كاسىپورىندارى قاتىساتىن كەڭەيتىلگەن اۋىل شارۋاشىلىعى جارمەڭكەسى وتەدى. ءىس-شارا «بەرەكە Fest» رەسپۋبليكالىق باستاماسى اياسىندا ۇيىمداستىرىلادى. جارمەڭكە ءبىرىنشى كەزەكتەگى قاجەتتى ونىمدەردىڭ باعاسىن تۇراقتاندىرۋعا، وتاندىق وندىرۋشىلەردى قولداۋعا جانە قازاقستاندىق ءونىمدى تۇتىنۋدى ىنتالاندىرۋعا باعىتتالعان.
جارمەڭكەگە الماتى وبلىسىنىڭ 12 اۋدانى مەن الماتى جانە قونايەۆ قالاسى قاتىسادى. قالا تۇرعىندارىنا 50-دەن استام ءونىم ءتۇرى: ەت جانە ءسۇت، جەمىستەر مەن كوكونىستەر، شۇجىق ونىمدەرى، ۇن، جارما، وسىمدىك جانە مال مايى ۇسىنىلادى. جارمەڭكەدەگى ءونىمنىڭ جالپى كولەمى 420 توننا، ونىڭ ىشىندە 100 توننا ەت، 150 توننا جەمىس-كوكونىس، 50 توننا ءسۇت جانە 120 توننا باسقا دا ونىمدەر.
الماتىلىقتار مەن قالا قوناقتارى قاجەتتى ونىمدەرىن تىكەلەي وندىرۋشىلەردەن قولجەتىمدى باعامەن ساتىپ الادى.
جارمەڭكە ساعات 8:00-دەن 17:00-گە دەيىن قازىبەك بي كوشەسىندە، ابىلاي حان داڭعىلىنان پانفيلوۆ كوشەسىنە دەيىنگى ارالىقتا وتەدى.