11–12 قازان كۇندەرى الماتىدا «بەرەكە Fest» رەسپۋبليكالىق باستاماسى اياسىندا كەڭەيتىلگەن اۋىل شارۋاشىلىعى جارمەڭكەسى وتەدى.
وعان الماتى وبلىسىنىڭ تاۋار وندىرۋشىلەرى، قالا كاسىپورىندارى جانە اباي وبلىسىنىڭ فەرمەرلەرى قاتىسادى، - دەپ حابارلايدى Aqshamnews.kz.
باستى ماقسات – الەۋمەتتىك ماڭىزى بار ازىق-تۇلىك باعاسىن تۇراقتاندىرۋ، وتاندىق وندىرۋشىلەردى قولداۋ جانە تۇرعىنداردى قولجەتىمدى ءارى ساپالى ونىممەن قامتاماسىز ەتۋ.
جارمەڭكە – باستامانىڭ نەگىزگى ءىس-شاراسىنىڭ ءبىرى. الماتىلىقتار دەلدالسىز، تىكەلەي فەرمەرلەردەن جاڭا ءونىم ساتىپ الا الادى. ءىس-شاراعا الماتى وبلىسىنىڭ ون اۋدانى مەن سەمەي قالاسى قاتىسادى.
جارمەڭكەدە كوكونىس پەن جەمىس-جيدەك، ءسۇت ونىمدەرى، شۇجىق، جارما، ۇن جانە ماي تۇرلەرى سىندۆ 50-دەن استام ءتۇرلى ءونىم ۇسىنىلادى.
سونىمەن قاتار، اباي وبلىسىنان 150 توننا ەت جەتكىزىلەدى. جالپى كولەمى 370 توننا اۋىل شارۋاشىلىعى ءونىمى ۇسىنىلادى، ونىڭ ىشىندە 60 توننا ءسۇت ءونىمى، 50 توننا كوكونىس-جەمىس، 30 توننا بالىق جانە 80 توننا وزگە دە تاۋارلار بار.
جارمەڭكە 11-12 قازان كۇندەرى ساعات 8:00-دەن 17:00-گە دەيىن قازىبەك بي كوشەسىندە، ابىلاي حان مەن پانفيلوۆ كوشەلەرىنىڭ اراسىنداعى اۋماقتا وتەدى.