الەۋمەتتىك جەلىدە بەلگىسىز ەر ادام مەكتەپكە كىرىپ، سىنىپتا وتىرعان بىرەۋدىڭ كىشكەنتاي بالاسىن ۇرىپ-سوققانى تۋرالى اقپارات پايدا بولدى.
وسىعان قاتىستى الماتى پوليسياسى مەن بالالاردىڭ قۇقىقتارىن قورعاۋ كوميتەتى پىكىر ءبىلدىردى، دەپ حابارلايدى Almaty-akshamy.kz.
بۇل تۋرالى تاياق جەگەن بالانىڭ اناسى ءوزىنىڭ Instagram –داعى پاراقشاسىندا جازدى.
ايتۋىنشا، ۇلىن سىنىپتاسىنىڭ اكەسى ۇرىپ-سوعىپ، تۇنشىقتىرعان.
«بۇل مەكتەپتە ءۇزىلىس كەزىندە بولدى. سىنىپ جەتەكشىسى جوق كەزدە سىنىپقا كىرىپ، قىلقىندىرىپ، ۇرىپ-سوعا باستاعان»، - دەلىنگەن جازبادا.
الماتى پوليسيا دەپارتامەنتىنىڭ مالىمەتىنشە، كەلەڭسىز جاعداي 2 اقپاندا بولعان.
«بۇل فاكتىنى جەرگىلىكتى پوليسيا قىزمەتىنىڭ، سونداي-اق يۋۆەنالدى پوليسيا قىزمەتكەرلەرى تىركەپ، نازارعا الدى. قازىرگى ۋاقىتتا ءىستىڭ ءمان-جايىن انىقتاۋ بويىنشا تەكسەرۋ شارالارى جۇرگىزىلۋدە، ونىڭ قورىتىندىسى بويىنشا شەشىم قابىلدانادى»، - دەپ حابارلادى ۆەدومستۆودان.
وقۋ-اعارتۋ مينيسترلىگى بالالاردىڭ قۇقىعىن قورعاۋ كوميتەتى دە الماتىدا بولعان جاعدايعا بايلانىستى تۇسىنىك بەردى.
«اۋداندىق ءبىلىم ءبولىمىنىڭ اقپارىنا سايكەس ديرەكتوردىڭ ورىنباسارىنا، سىنىپ جەتەكشىسىنە، كۇزەتشىگە قاتىستى ءتيىستى تارتىپتىك شارالار قابىلدانعانىن حابارلايمىز. اتالعان ماسەلە بالالاردىڭ قۇقىقتارىن قورعاۋ كوميتەتى مەن بالا قۇقىقتارى جونىندەگى وڭىرلىك ۋاكىلدىڭ باقىلاۋىندا. بۇگىندە تەرگەۋ امالدارى جۇرگىزىلۋدە»،- دەلىنگەن حابارلامادا.