الماتىدا تولە بي داڭعىلى مەن مۇراتبايەۆ كوشەسىنىڭ قيىلىسىندا ورنالاسقان كەڭسە عيماراتىنىڭ جانىنان جارىق شۋىلدى گراناتا تابىلدى، دەپ حابارلايدى اlmaty-akshamy.kz قالالىق پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
پوليسيانىڭ مالىمەتىنە سايكەس، جوعارىدا اتالعان اۋماقتى ارالاپ جۇرگەن كۇزەتشى كەڭسە عيماراتىنىڭ جانىنان ءوق-دارى تاپقان. وقيعا ورنىنا قالانىڭ شۇعىل قىزمەتتەرى كەلىپ، ىرگەلەس ايماقتى قورشاۋعا الدى.
كەيىننەن ساپەرلەر حابارلاعانداي، گراناتا تۇتاندىرعىشسىز جانە ادامدارعا ءقاۋىپ توندىرمەيتىنى بەلگىلى بولدى.
«المالى اۋداندىق پوليسيا باسقارماسىنىڭ جەدەل تەرگەۋ توبى توتەنشە جاعدايدىڭ ءمان-جايىن انىقتايدى. ايتا كەتەيىك، جارىق شۋىلدى وق-دارىلەر - بۇل ادامعا جارىق شۋىلدى جانە جارىقشاقتى اسەر ەتەتىن، ولىمگە اكەلمەيتىن ارنايى قۇرالدار بولىپ تابىلادى»، - دەپ حابارلادى پوليسيادان.