الماتى قالاسىنداعى 28 گۆاردياشى-پانفيلوۆشىلار پاركىندە باۋىرجان مومىش ۇلىنىڭ ەسكەرتكىشىنە سالتاناتتى تۇردە گۇل قويۋ ءراسىمى ءوتتى.
ءىس-شاراعا داڭقتى قولباسشىنىڭ تۋىستارى، اسكەري قىزمەتكەرلەر، زيالى قاۋىم وكىلدەرى، ۇقك شەكارا اكادەمياسىنىڭ كۋرسانتتارى جانە قالا تۇرعىندارى قاتىستى. سالتاناتتى جيىن بارىسىندا باتىر رۋحىنا ءبىر مينۋت ۇنسىزدىك جاريالاندى.
راسىمگە قاتىسقان باۋىرجان مومىش ۇلى اۋلەتىنىڭ مۇشەسى زەينەپ احمەتوۆا جىلى ەستەلىكتەرىمەن ءبولىستى.
— مارقۇم اتام ءبىر كەزدە: «مەن ولگەننەن كەيىن دە تىرىلەردىڭ اراسىندا ءومىر سۇرەتىن بولامىن»، — دەپ ايتقان ەدى. ول كەزدە جاس بولدىم، بۇل ءسوزدىڭ ءمانىن تولىق تۇسىنە بەرمەدىم. ال ءقازىر اينالاما قاراسام، راسىندا دا سولاي ەكەنىن كورىپ وتىرمىن. بۇكىل قازاقستان اتاما «حالىق قاھارمانى» اتاعى بەرىلگەنىنە قۋانىپ جاتىر. دەمەك، ول سوزدەر شىن مانىندە كورەگەندىكپەن ايتىلعان. ول راسىمەن دە تىرىلەردىڭ اراسىندا ءومىر ءسۇرىپ كەلەدى، — دەدى زەينەپ احمەتوۆا.
شاراعا قازاقستاننىڭ ەڭبەك ەرى، پەداگوگيكا سالاسىنىڭ ارداگەرى، الماتى قالاسىنىڭ قۇرمەتتى ازاماتى اياگۇل ميرازوۆا دا قاتىستى.
— مەملەكەت باسشىسى قاسىم-جومارت توقايەۆتىڭ باۋىرجان مومىشۇلىنا «حالىق قاھارمانى» اتاعىن بەرۋى بۇكىل ەل ءۇشىن ۇلكەن قۋانىش بولدى. حالىق ونى بۇرىننان باتىر دەپ تانىعان. ال رەسمي تۇردە، قۇجات جۇزىندە مويىندالۋى — اسا ماڭىزدى ءارى تاريحي وقيعا. باۋىرجان مومىش ۇلىنىڭ ەڭبەگى تەك ەلىمىزدە عانا ەمەس، شەتەلدەردە دە جوعارى باعالانادى، ونىڭ اسكەري تاكتيكاسى ءالى كۇنگە دەيىن زەرتتەلىپ كەلەدى. ونىڭ ارتىندا تەك اسكەري ەمەس، تاربيەلىك مۇرا دا قالدى. مەن پەداگوگ رەتىندە، 50 جىل ۇستازدىق ەتكەن ادام رەتىندە ايتارىم: ونىڭ ۇلتتىق قۇندىلىقتارعا كوزقاراسى، تاربيەلىك ۇستانىمى — بىرەگەي. سوندىقتان باۋىرجان مومىش ۇلىنىڭ ءاربىر ءسوزى مەن وسيەتى مەكتەپ باعدارلاماسىنا ەنۋى كەرەك. ويتكەنى ءوسىپ كەلە جاتقان ۇرپاق ءۇشىن ونىڭ ونەگەسى ايرىقشا ماڭىزعا يە، — دەدى اياگۇل ميرازوۆا.
جيىنعا اكادەميك، قازاقستان عالىمدار وداعىنىڭ پرەزيدەنتى، مەملەكەتتىك سىيلىقتىڭ لاۋرەاتى ورازالى سابدەن دە قاتىسىپ، باۋىرجان مومىشۇلىنا «حالىق قاھارمانى» اتاعىنىڭ بەرىلۋىن ۇلتتىق رۋحتى كوتەرەتىن ماڭىزدى وقيعا رەتىندە باعالادى.
— بۇگىن — شىن مانىندە ايتۋلى كۇن. كەشە عانا بۇكىل قازاقستان پرەزيدەنت جارلىعىمەن الەمگە تانىمال باتىر باۋىرجان مومىشۇلىنا «حالىق قاھارمانى» اتاعى بەرىلگەنىنە كۋا بولدى. حالىق «بۇل اتاق 80 جىل بۇرىن بەرىلۋى كەرەك ەدى» دەپ ايتىپ ءجۇر. دەگەنمەن، كەش بولسا دا، ونىڭ بەرىلۋى ەلدىڭ جۇرەگىنە جىلۋ ۇيالاتتى. ءقازىر جاستاردى قالاي تاربيەلەۋ كەرەك دەگەن ماسەلە ەرەكشە وزەكتى. ءدال وسى كەزەڭدە باۋىرجان مومىشۇلىن قايتا تانىپ، ونىڭ مۇراسىنا جاڭاشا كوزقاراسپەن قاراۋ قاجەت. ەگەر حالقىمىزعا زور سەرپىن بەرگەن ەكى تۇلعانى ايتار بولساق، ءبىرى — اباي، ەكىنشىسى — باۋىرجان مومىش ۇلى. اباي «جىلى جۇرەك، قايراتتى ەرىك، نۇرلى اقىل» دەپ كەمەل ادامدى سيپاتتاسا، باۋىرجان سول قاسيەتتەردى ەرلىك جولىنا باعىتتاي ءبىلدى. ءقازىر ەلىمىزدىڭ تۇكپىر-تۇكپىرىندە باۋىرجان مومىش ۇلىنىڭ 115 جىلدىعى اتالىپ وتۋدە. يدەولوگيانى سىرتتان ىزدەۋدىڭ قاجەتى جوق. ءبىزدىڭ يدەولوگيامىز — اباي مەن باۋىرجان. وسى ەكى ۇلى تۇلعانىڭ دانالىعى مەن ەرلىگىن ۇشتاستىرا بىلسەك، قازاق حالقى بيىك بەلەستەرگە كوتەرىلەدى، — دەپ تۇيىندەدى ورازالى سابدەن.
رەسمي ءبولىم اياقتالعان سوڭ ۇقك شەكارا اكادەمياسىنىڭ كۋرسانتتارى باۋىرجان مومىش ۇلىنىڭ ەسكەرتكىشى الدىندا ساپ تۇزەپ ءوتىپ، باتىرعا اسكەري قۇرمەت كورسەتتى.