الماتى قالاسىندا جاڭا جىل قارساڭىندا ءداستۇرلى وتباسىلىق مارافون ۇيىمداستىرىلدى. Almaty Arena اۋماعىندا وتكەن شارا «ءبىر ماقسات. ءبىر باعىت» ۇرانىمەن ءوتىپ، قالا تۇرعىندارى مەن قوناقتارىن ورتاق باعىتقا بۇردى.
ءىس-شارا الاتاۋ اۋدانى اكىمدىگىنىڭ قولداۋىمەن ۇيىمداستىرىلىپ، BI Group، Bazis-A جانە Sensata Group كومپانيالارى دەمەۋشىلىك كورسەتتى. كورسەتىلگەن قولداۋدىڭ ناتيجەسىندە مارافونعا قاتىسۋ كوپشىلىككە قولجەتىمدى بولدى. مارافون باعدارلاماسى بالالار مەن ەرەسەكتەرگە ارنالعان ينتەراكتيۆتى الاڭدارمەن تولىقتى.مارافونعا قاتىسىپ مارەگە جەتكەن بارلىق جۇگىرگىشكە ەستەلىك مەدال تابىستالىپ، ەڭ ەرەكشە وبرازداعى قاتىسۋشىلار «ەڭ ۇزدىك كوستيۋم» نوميناسياسى بويىنشا ارنايى جۇلدەگە يە بولدى. شارا بارىسىندا قاتىسۋشىلار سيمۆوليكالىق 2026 مەتر قاشىقتىقتى جۇگىرىپ ءوتتى. بۇل قاشىقتىق جاڭا جىلدى بەلسەندى تۇردە قارسى الۋدىڭ بەلگىسىنە اينالدى.
ۇيىمداستىرۋشىلاردىڭ مالىمەتىنشە، مارافونعا 1500 ادامعا ارنالعان سلوت ۇسىنىلىپ، ولاردىڭ باسىم بولىگى الدىن الا تىركەلدى. الاتاۋ اۋدانى سوڭعى جىلدارى قارقىندى دامىپ كەلە جاتقان، سپورتتىق ينفراقۇرىلىمى قالىپتاسقان اۋدان رەتىندە ەرەكشەلەنەدى. وسىنداي بۇقارالىق سپورتتىق ءىس-شارالار تۇرعىندار اراسىندا سالاۋاتتى ءومىر سالتىن ناسيحاتتاپ، جاڭا جىلدى وتباسىمەن بىرگە قارسى الۋ ءداستۇرىن نىعايتا تۇسۋدە.
مارافوندا ينكليۋزيۆتىلىككە ەرەكشە كوڭىل ءبولىندى. جارىسقا الاتاۋ اۋدانىنداعى ەرەكشە قاجەتتىلىگى بار بالالار، Meiirim وڭالتۋ ورتالىعىنىڭ تاربيەلەنۋشىلەرى، سونداي-اق استانادان كەلگەن «جاناسۋ – پريكوسنوۆەنيە» قورىنىڭ قاتىسۋشىلارى قاتىستى. مارافونعا قاتىسۋشى بايان تۇرسىنبايەۆانىڭ ايتۋىنشا، مۇنداي شارالار وتباسىلىق قارىم-قاتىناستى ارتتىرادى. «ءبىز مارافونعا ارنايى ۇندىستەردىڭ كيىمىن كيىپ كەلدىك. اۋا رايى سۋىق بولعانىمەن، كوڭىل كۇيىمىز جاقسى بولدى. كوستيۋمدەردى ءبىر اي بويى ءوز قولىمىزبەن دايىندادىق. وسىنداي وتباسىلىق شارالار كوپ بولسا ەكەن»، – دەدى ول.
«ءبىر ماقسات. ءبىر باعىت» ۇرانىمەن وتكەن مارافون الماتىلىقتار ءۇشىن سپورت پەن مەرەكەنى ۇشتاستىرعان مازمۇندى ءارى ەستە قالارلىق وقيعا بولدى.