زاڭ جوباسى بويىنشا جۇمىس توبىنىڭ 16 وتىرىسى ءوتتى.
الماتىدا VIII سايلانعان ءماجىلىس جانىنداعى قوعامدىق پالاتانىڭ كوشپەلى وتىرىسىندا ءماجىلىس دەپۋتاتى جۇلدىز سۇلەيمەنوۆا «بۇقارالىق اقپارات قۇرالدارى تۋرالى» زاڭ جوباسىنىڭ تالقىلانۋى جايلى ايتتى، دەپ حابارلايدى Almaty-akshamy.kz
«ماسس-مەديا» زاڭى تارتىستى جانە مازمۇندى تالقىلانىپ جاتىر. زاڭ جوباسى بويىنشا جۇمىس توبىنىڭ 16 وتىرىسى ءوتتى. ودان بولەك، 4 جۇمىس كەزدەسۋى، بۇگىن بەسىنشىسى ءوتىپ جاتىر. بارلىعى 21 وتىرىس وتكىزدىك. قازىرگى كەستەدە 179 پوزيسيا بار. ونىڭ ىشىندە 26 پوزيسيانى مەديا-قوعامداستىق وكىلدەرى، ازاماتتىق قوعام وكىلدەرىمەن بىرلەسىپ ازىرلەنگەن نورمالار بولاتىن»، - دەدى جۇلدىز سۇلەيمەنوۆا.
دەپۋتات اتاعانداي، جۋرناليستەردى اككرەديتتەۋ ماسەلەسى كوپ سۇراق تۋىنداتقان.
«ۇكىمەتتەن كەلىپ تۇسكەن نورمادا جۋرناليستەردى اككرەديتتەۋ جانە ولاردى جەڭىلدەتىلگەن اككرەديتتەۋ، «باسپا ءسوز كارتاسى» دەگەن ءۇش ۇعىم بەرىلدى. ءبىز اككرەديتتەۋدى نەگىزگى تولىققاندى ءبىر ۇعىم قالدىرۋدى سۇرايمىز. جەڭىلدەتىلگەن جانە «باسپا ءسوز كارتاسىن» الىپ تاستاۋعا بايلانىستى «AMANAT» پارتياسى فراكسياسىنىڭ جەتەكشىسى ەلنۇر بەيسەنبايەۆ، الەۋمەتتىك-مادەني دامۋ كوميتەتىنىڭ ءتوراعاسى اسحات ايماعامبەتوۆ بىرلەسىپ «باسپا ءسوز كارتاسىن» الىپ تاستاۋ بويىنشا تۇزەتۋ ەنگىزدى»، - دەدى ول.
دەپۋتات اككرەديتتەۋ ورتاق ۇعىمعا جانە ورتاق نەگىزدەلگەن تارتىپكە نەگىزدەلۋى قاجەت ەكەنىن ايتتى.
«ەگەر ول جەڭىلدەتىلگەن نەمەسە ونىڭ ونلاين تاعى دا باسقا تۇرلەرىن ۇسىنساق، ازاماتتار اراسىندا تۇسىنسپەۋشىلىك تۋىندايدى. كونستيتۋسيالىق تەڭدىك ماسەلەسى دە تۋىندايتىنىن مەديا-قاۋىمداستىق وكىلدەرى دالەلدەپ، دايەكتى تۇردە جەتكىزدى. ءماجىلىستىڭ «ماسس-مەديا» زاڭ جوباسى بويىنشا جۇمىس توبى مەن دەپۋتاتتار «باسپا ءسوز كارتاسى» دەگەن نورمانى قولدامايدى. ول نورمانى الىپ تاستاۋعا بايلانىستى تۇزەيتۋ ەنگىزىلدى. ونى ءارى قاراي داۋىس بەرۋ ارقىلى بىرلەسىپ شەشەمىز»، - دەدى ول.