الماتىدا بالالارعا ارنالعان تاۋ لاگەرى اشىلدى

بالالار 7 كۇندىك تاۋ دايىندىعى باعدارلاماسىنان ءوتىپ، تاۋعا ورمەلەۋ، تاۋ ءتۋريزمى جانە الپينيزم ەلەمەنتتەرىن ۇيرەنەدى.

قورعانىس مينيسترلىگىنىڭ اقپاراتىنشا، بولاشاق وتان قورعاۋشىلار شاتىرلى لاگەردىڭ تۇرمىسىن ۇيىمداستىرىپ، ءوز بەتىنشە تاماق دايىنداۋدى ۇيرەنەدى، دەپ حابارلايدى Almaty-akshamy.kz.

لاگەرگە ءبىرىنشى بولىپ «كيروۆ»، «شەكارا قىزمەتى دەپارتامەنتىنىڭ جاس شەكاراشىلارى» جانە №95 جالپى ءبىلىم بەرەتىن مەكتەپتىڭ بوريس كەرىمبايەۆ اتىنداعى اسكەري-پاتريوتتىق كلۋبتارىنىڭ تاربيەلەنۋشىلەرى باردى.

« جازعى اسكەري-دالالىق لاگەرلەردىڭ باستى ماقساتى – جاس ارمياشىلاردى اسكەري-قولدانبالى جانە پاتريوتتىق تاربيەلەۋدى قامتيتىن بالالاردىڭ دەمالىسىن ۇيىمداستىرۋ»، - دەپ اتاپ ءوتتى №95 جالپى ءبىلىم بەرەتىن مەكتەپتىڭ اسكەري جەتەكشىسى باقىتجان پىرىمبەتوۆ.

لاگەر جۇمىسى الماتى قالاسىنىڭ قورعانىس ىستەرى جونىندەگى دەپارتامەنتى، الماتى وبلىسىنىڭ شەكارا قىزمەتى جانە «جاس سارباز» قوزعالىسى دەپارتامەنتىمەن بىرلەسىپ ۇيىمداستىرىلدى.

تاۋ دايىندىعى باعدارلاماسىنا سايكەس تاربيەلەنۋشىلەردىڭ جاس ساناتىنا بايلانىستى بىرنەشە شىڭعا مىندەتتى تۇردە كوتەرىلۋ كوزدەلگەن.