الماتىدا بالالار ۋلانعان ءقوناقۇي تەكسەرىلدى

دالىزدە جاندىكتەردەن دەزينسەكسيالىق وڭدەۋ جۇرگىزىلگەن

الماتىدا «تۇركىستان» قوناقۇيىندە 18 بالا حيميالىق زاتتان ۋلاندى. بۇل تۋرالى الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنەن ءمالىم ەتتى، دەپ حابارلايدى Almaty-akshamy.kz.
ۆەدومستۆونىڭ مالىمەتىنشە، 11 شىلدەدە تاڭعى ساعات 04:50-دە قالالىق توتەنشە جاعدايلار دەپارتامەنتىنەن شۇعىل حابارلاما تۇسكەن. تۇندە ءقوناقۇيدىڭ 407 بولمە مەن 4 قاباتتىڭ دالىزىندە جاندىكتەردەن دەزينسەكسيالىق وڭدەۋ جۇرگىزىلگەنى بەلگىلى بولدى.

«ساعات 08:40-تا الماتى قالالىق سانيتارلىق-ەپيدەميولوگيالىق باقىلاۋ دەپارتامەنتى مەن ۇلتتىق ساراپتاما ورتالىعى فيلالىنىڭ ماماندارى 407، 409، 417 ءقوناقۇي نومىرلەرىندە جانە 4 قابات دالىزىندە اۋاداعى فورمالدەگيد، دەگيدروسۋلفيد، اممياك، حلورسۋتەگى جانە حلوردىڭ كونسەنتراسياسىن انىقتاۋعا زەرتحانالىق-اسپاپتىق زەرتتەۋلەر جۇرگىزدى. ناتيجەسىندە شەكتى اتالعان زاتتاردىڭ نورمالاردان اسۋ جاعدايى انىقتالعان جوق»،- دەپ حابارلادى قالالىق سانيتارلىق-ەپيدەميولوگيالىقباقىلاۋ دەپارتامەنتىنەن.

بارلىق زارداپ شەككەندەرگە دەر كەزىندە مەديسينالىق كومەك كورسەتىلدى. دەنساۋلىقتارى جاقسارۋىنا بايلانىستى زارداپ شەككەن 13 بالا مەن 1 ءجاسوسپىرىم سول كۇنى تاڭعى ساعات 09:30-دا بالالارعا شۇعىل مەديسينالىق كومەك كورسەتۋ ورتالىعىنان شىعارىلدى. تاعى ءتورت بالانىڭ جاعدايى اۋىر دەپ باعالاندى. الماتى قالاسى قوعامدىق دەنساۋلىق ساقتاۋ باسقارماسىنىڭ مالىمەتىنشە، بۇگىنگى كۇنى بالالاردىڭ جاعدايى تۇراقتى.

«دەپارتامەنت مامانى بالالار زارداپ شەككەن قوناقۇيدەن ولاردى كوشىرۋدى ۇيىمداستىردى. سونداي-اق، پاۆلودار قالاسىنان كەلگەن زارداپ شەككەن بالالاردىڭ اتا-انالارىن ورنالاستىرۋعا كومەك كورسەتتى»، - دەپ اتاپ ءوتتى ۆەدومستۆو.