الماتىدا العاش رەت №2 قالالىق بالالار كلينيكالىق اۋرۋحاناسىندا بالالارداعى جامباس بۋىنىنىڭ تۋا بىتكەن اقاۋلارىنا جوعارى تەحنولوگيالىق رەكونسترۋكتيۆتىك وتالار جاسالدى. دالىرەك ايتساق، شەبەرلىك ساباعى اياسىندا تۇركيانىڭ جەتەكشى ورتوپەدى شەنول بەكمەزدىڭ قاتىسۋىمەن 4 قازاقستاندىق بالاعا جوعارى بىلىكتى كومەك كورسەتىلدى. بارلىق وپەراسيا ءساتتى ءوتتى.
14 جاستاعى ءجاسوسپىرىمنىڭ اتا-اناسى №2 الماتى بالالار اۋرۋحاناسىنا كەلىپ، بالاسىنىڭ اقساڭداپ، اياعىن اۋىرسىنىپ جۇرگەنىن ايتقان. دارىگەرلەر «باس جامباس سۇيەكتىڭ ەپيفيزەوليزى» دياگنوزىن قويدى. بۇل – جامباس سۇيەك موينىنىڭ العا قاراي جىلجىپ، قيسىق ءوسۋى. ءبىزدىڭ ەلىمىزدە العاش رەت وتكىزىلگەن يمحاۋزەر وتاسىن تۇرىك ارىپتەسىمىزبەن بىرلەسىپ ورىنداۋ تۋرالى شەشىم قابىلداندى.
«باس جامباس سۇيەكتىڭ ءقاۋىپسىز شىعارىلۋى جاسالدى. سۇيەك شىعىڭقىسى جويىلدى. سودان كەيىن ۆەرتلۋجدى ويپاتتىڭ سەنتراسياسى جاسالدى. بۇل يمحاۋزەر وتاسىنىڭ موديفيكاسياسى: يمپيچمەنت، ياعني قوزعالىستى شەكتەۋ بولماۋى ءۇشىن سۇيەكتىڭ شىعىڭقى بولىگى جويىلادى. مۇنداي وتالار بۇرىن قازاقستاندا جاسالماعان»، – دەدى تراۆماتولوگيا ءبولىمىنىڭ مەڭگەرۋشىسى ەرلان سادىربالين.
ءدال وسىنداي دياگنوزى بار تاعى ءبىر 15 جاستاعى بالاعا وسىنداي وتا جاسالدى. ەكى بالادا دا العاشقىدا جەڭىل اۋىرسىنۋ سيندرومى پايدا بولعان جانە ەكى-ۇش اي بويى مازالاعان. ءبىراق جاسوسپىرىمدەر بۇل تۋرالى اتا-انالارىنا ايتپاعان. سوندىقتان ماماندارعا جۇگىنگەن كەزدە تۇزەتۋگە كەش بولدى. كەيىنگى كەزەڭدەگى تۇزەتۋلەر باس جامباس سۇيەكتىڭ اسەپتيكالىق نەكروزى سياقتى اسقىنۋلارعا اكەلەدى. سوندىقتان دارىگەرلەر جامباس سۇيەگىنىڭ باسىن بۇراندامەن اياماي بەكىتىپ، ونى بىرىكتىردى. سودان كەيىن ولار بالالاردى وتاعا دايىندادى.
دارىگەرلەردىڭ ايتۋىنشا، ادەتتە مۇنداي دياگنوزى بار بالالار وتە كەش كەلەدى. سوندىقتان ۋاقىت وتكىزىپ العاندىقتان كۇردەلى دە اۋىر وتاعا جاتۋىنا تۋرا كەلەدى. ال دەر شاعىندا كەلگەن بولسا، شاعىن وتا جاساۋعا جانە ءسال عانا 2 سانتيمەترلىك كەسۋ ارقىلى سۇيەكتى بۇراندامەن بەكىتۋگە بولاتىن كورىنەدى. سوندىقتان جاعدايدىڭ كۇردەلى بولىپ كەتپەۋى ءۇشىن اتا-انالار كوز الدىندا جۇرگەن بالالارىنىڭ اقساڭداپ جۇرگەنىنە نازار اۋدارۋى كەرەك. بۇل كەزدە بالانىڭ ومىرتقا باعاناسىندا اۋىرسىنۋ پايدا بولا باستايدى.
يمحاۋزەر وتاسى – بۇكىل الەم بويىنشا جاڭا ءادىس. وتانىڭ قيىندىعى – سۇيەكتىڭ ورىن اۋىستىرۋ 40 گرادۋستان جوعارى بولدى، سوندىقتان ورتوپەدتەرگە جامباس بۋىنىن بۋىن كاپسۋلاسىنىڭ تامىرلارىنا زاقىم كەلتىرمەستەن شىعارىپ، دەفورماسيانى تۇزەتىپ، ەشتەڭەگە زاقىم كەلتىرمەۋ ءۇشىن ورنىنا قويۋ كەرەك بولدى.
ءوز كەزەگىندە شەنول بەكمەز: «وتانى جاساماۋ مۇمكىن ەمەس، ويتكەنى بالا ءومىر بويى اقساڭداپ قالادى، ال الداعى 10 جىلدا ەرتە ارتروز، دەفورماسيا جانە ەندوپروتەزدەۋ قاجەتتىلىگى تۋىندايدى» دەپ اتاپ ءوتتى. اۋرۋلاردىڭ 90%-ى ەمدەلمەگەن جاعدايدا ارتروزعا اكەلەدى. سوندىقتان بۇل وتا پروتەزدەۋ ءۇشىن كولەمدى حيرۋرگيالىق ارالاسۋدى بولدىرماۋ نەمەسە كەيىنگە قالدىرۋ ءۇشىن جاسالۋى كەرەك. بۇل وتانىڭ نەگىزگى مىندەتى – ءجۇرىس پەن دەفورماسيانى تۇزەتۋ جانە جامباس بۋىنىن ساقتاۋ دەيدى ماماندار.