الماتى پوليسياسى قالا مەكتەپتەرىنىڭ ديرەكتورلارىمەن بالالار اراسىنداعى ءسۋيسيدتىڭ الدىن الۋ ماسەلەسىن تالقىلادى.
جەرگىلىكتى پوليسيا قىزمەتىنىڭ حابارلاۋىنشا، بۇعان دەيىن شاھاردىڭ المالى، الاتاۋ جانە اۋەزوۆ اۋداندارىندا جۇمىس كەزدەسۋلەرى وتكەن، دەپ حابارلايدى Almaty-akshamy.kz Polisia.kz-كە سىلتەمە جاساپ.
«كۇن تارتىبىندە بالالاردىڭ قاۋىپسىزدىگىن قامتاماسىز ەتۋ، اتاپ ايتقاندا، مەكتەپ وقۋشىلارىنىڭ وقۋ بارىسىندا قاۋىپسىزدىكتەرىن قامتاماسىز ەتۋ ماسەلەلەرى قارالدى. بەينەروليك كورسەتۋ بارىسىندا داعدارىس جاعدايىندا وقۋشىلار مەن مەكتەپ قىزمەتكەرلەرىنىڭ ىس-ارەكەتىنىڭ الگوريتمى ءتۇسىندىرىلدى. سونىمەن قاتار، جالپى ءبىلىم بەرۋ ۇيىمدارىنىڭ باسشىلارىنا كامەلەتكە تولماعاندار اراسىنداعى جەدەل جاعداي، مەكتەپ وقۋشىلارى اراسىنداعى قۇقىقبۇزۋشىلىقتىڭ، كامەلەتكە تولماعاندارعا قارسى، ونىڭ ىشىندە ولاردىڭ جىنىستىق قول سۇعىلماۋشىلىقتارىنا قارسى قىلمىستاردىڭ، سونداي-اق بالالاردىڭ ءوزىن-وزى قۇرتۋ ارەكەتتەرىنىڭ الدىن الۋ بويىنشا جۇرگىزىلىپ جاتقان جۇمىستار تۋرالى حاباردار ەتىلدى»، – دەپ حابارلادى الماتى قالاسى پد جپقب يۋۆەنالدى پوليسيا ءبولىمىنىڭ باستىعى جاننا شونجانوۆا.
اۋتودەسترۋكتيۆتى مىنەز-قۇلىق – جاڭا قۇبىلىس ەمەس. جاسوسپىرىمدەردىڭ اۋتودەسترۋكتيۆتى مىنەز-قۇلقىنىڭ بەلگىلەرى كوبىرەك بايقالادى، كوبىنەسە بۇل ۇعىم سۋيسيدتىك جانە ءوزىن-وزى زاقىمدايتىن مىنەز-قۇلىقتى، كەيدە الكوگول مەن ناشاقورلىققا تاۋەلدىلىكتى بىلدىرەدى. پوليسەيلەردىڭ ايتۋىنشا، بالالاردىڭ قاۋىپسىزدىگىن قامتاماسىز ەتۋ ماسەلەلەرىن بارلىق مۇددەلى مەملەكەتتىك ورگاندار مەن قوعامنىڭ بىرلەسكەن كۇش-جىگەرى ارقىلى عانا شەشۋگە بولادى.