ءقازىردىڭ وزىندە ءبىر جاسقا تولماعان 200 شاقتى نارەستە كوروناۆيرۋستان ەمدەلىپ جاتىر.
الماتىدا بالالار اراسىنداعى ىندەت جۇقتىرۋ كورسەتكىشى بىلتىرعى جىلمەن سالىستىرعاندا 22 ەسەگە كوبەيگەن، دەپ حابارلايدى Almaty-akhamy.kz Almaty.tv سايتنا سىلتەمە جاساپ.
دارىگەرلەردىڭ ايتۋىنشا، قالادا 14 جاسقا دەيىنگى 965 بالا COVID-19 شالدىققان. وعان شاھاردا «دەلتا» شتامىنىڭ بەلەڭ الۋى سەبەپ بولعان. وسىلاي دەگەن قالانىڭ باس سانيتاريالىق دارىگەرى جانداربەك بەكشين الماتىلىق اتا-انالاردى بالالارىن باقىلاۋعا الۋعا شاقىردى. ايتۋىنشا، ولار قولدارىن ءجيى سابىنمەن جۋىپ، دەزينفەكسيالاۋى كەرەك. ادامدار كوپ جينالاتىن جەرلەردەن اۋلاق بولىپ، قوعامدىق ورىنداردا بەتپەردە تاققانى ءجون.
"دەلتا" شتامىنىڭ ەرەكشەلىگى – بۇل جاس بالالار اراسىندا جىلدام تارالىپ جاتقان ۆيرۋس. ءقازىر شامامەن 200 نارەستە بالا اۋىرىپ جاتىر. قالا جۇرتى وسى كورسەتكىشتى ەسكەرسە دەيمىن. ازىرشە ويىن الاڭدارى، ساياباقتار جانە باسقا دا قوعامدىق ورىنداردان باس تارتا تۇرعان ءجون. اتا-انالار تولىق قىراعىلىق تانىتۋى كەرەك. بەس جاستان اسقان بالالار بەتپەردە رەجيمىن ساقتاۋى ءتيىس»، – دەدى قالانىڭ باس مەملەكەتتىك سانيتار دارىگەرى جانداربەك بەكشين.