«ەل ەرتەڭى» قوعامدىق قورى الماتىلىقتاردى تاۋەلسىز باقىلاۋشى بولۋعا شاقىرادى.
الماتىدا «ەل ەرتەڭى» قوعامدىق قورىنىڭ ۇيىمداستىرۋىمەن باسپا ءسوز كونفەرەنسياسى ءوتتى. وندا ۇيىم مۇشەلەرى ەل ازاماتتارىن، اسىرەسە، جاستاردى وزدەرىنىڭ بەلسەندىلىكتەرىن كورسەتىپ، الداعى ءماجىلىس سايلاۋىندا باقىلاۋشى بولۋعا شاقىردى، دەپ حابارلايدى اlmaty-akshamy.kz
- «الداعى سايلاۋدا باقىلاۋشى بولۋعا ءوز ۇيىمىمىزعا ادامداردى جينايىن دەپ جاتىرمىز. 18 جاستان اسقان كەز كەلگەن قازاقستان ازاماتى ءبىزدىڭ ۇيىمعا كەلىپ، باقىلاۋشى رەتىندە قوسىلا الادى. ءبىزدىڭ ماقساتىمىز – الداعى سايلاۋدىڭ ءادىل ءوتۋىن قامتاماسىز ەتۋ. وتكەن پرەزيدەنت سايلاۋىندا ءوزىم دە باقىلاۋشى بولىپ قاتىستىم. ەندى وسى سايلاۋعا ءبىزدىڭ ۇيىمنىڭ اتىنان العاش رەت بارايىن دەپ وتىرعان جاس باقىلاۋشىلارعا ءوز تاجىريبەمدى بولىسەمىن»، - دەدى «ەل ەرتەڭى» ۇيىمىنىڭ مۇشەسى، جاس ءمۇعالىم سۇلتان ايتبايەۆ.
- «ەل ەرتەڭى» ۇيىمى بۇعان دەيىن دە سايلاۋلارعا اتسالىسقان بولاتىن. ەندى ەلىمىزدىڭ جاس ازاماتى، بەلسەندى رەتىندە الداعى ءماجىلىس پەن ءماسليحات سايلاۋىندا دا ءوز ۇلەسىمىزدى قوسقىمىز كەلىپ وتىر. سايلاۋ ۋچاسكەلەرىندە بىلمەستىكتەن ءارتۇرلى ماسەلەلەر تۋىنداپ جاتادى. ءبىز وسىنداي جاعدايلاردىڭ الدىن العىمىز كەلەدى. ءبىزدىڭ ۇيىمعا جۇگىنگەن جاستاردى الداعى ۋاقىتتا ارنايى وقىتامىز. سايلاۋدىڭ ءوزىنىڭ ەرەجەلەرى بار. ءبىز سول ەرەجەلەردى جانە بارلىق تالاپ-مىندەتتەردى تانىستىرىپ، قۇقىقبۇزۋشىلىقتىڭ الدىن الۋعا جۇمىس ىستەيتىن بولامىز. سونىمەن قاتار، ۇيىمعا قوسىلعان ءار ازاماتقا كۋالاندىراتىن كۋالىك بەرەمىز»، – دەدى «ەل ەرتەڭى» ۇيىمىنىڭ بەلسەندىسى، Phd مامان بايزاق ماقسات.
«ءبىزدىڭ ۇيىم پرەزيدەنت سايلاۋى كەزىندە الماتىنىڭ 8 اۋدانى بويىنشا بارلىق سايلاۋ ۋچاسكەلەرىن قامتىدى. بۇل جولى دا قالامىزدىڭ 500-دەن استام اشىق سايلاۋ ۋچاسكەلەرىنە كەمى ءبىر باقىلاۋشىدان جىبەرۋدى جوسپارلاپ وتىرمىز. ءبىز ۇيىمعا قابىلداۋدى ءالى باستاماساق تا، وتكەن سايلاۋدا قاتىسىپ، وسى جولى دا باقىلاۋشى بولامىن دەپ جاتقان جاستار كوپ»، – دەيدى ۇيىم بەلسەندىسى ديدار قۇرمان.