الماتىدا 17 ماۋسىمنان باستاپ «سالىق بەرەشەگى جوق قالا» اكسياسى باستالدى، دەپ حابارلايدى Almaty-akshamy.kz Inform.kz-سىلتەمە جاساپ.
ۆەدومستۆونىڭ مالىمەتىنشە، اكسيانىڭ ماقساتى اۆتوكولىك يەلەرىنەن سالىق بەرەشەگىن ءماجبۇرلى تۇردە ءوندىرىپ الۋ. اكسيا شەڭبەرىندە الماتى قالاسى بويىنشا مەملەكەتتىك كىرىستەر دەپارتامەنتى قالالىق پوليسيا دەپارتامەنتى جانە جەكە سوت ورىنداۋشىلارىمەن بىرلەسە رەيدتىك ءىس-شارالار وتكىزەدى.
رەيد بارىسىندا بەرەشەگى بار بورىشكەرلەردىڭ اۆتوكولىكتەرى «سەرگەك» بەينەكامەرالارى ارقىلى انىقتالىپ، بەرەشەك تولىق وتەلگەنشە ايىپپۇل تۇراعىنا قويىلادى. ەكى ساعات جۇمىس ىشىندە 11 ملن تەڭگە قارىزى بار وننان استام كولىك ايىپپۇل تۇراعىنا قويىلدى.
«بۇگىنگى كۇنى مەگاپوليستە كولىك قۇرالدارىنا سالىناتىن سالىق بويىنشا بەرەشەك 5 ملرد تەڭگەدەن استام سومانى قۇرادى. بۇل رەتتە سومانىڭ نەگىزگى بولىگى قوزعالتقىش كولەمى 4 مىڭ تەكشە سم-دەن اساتىن كولىك يەلەرىنە تيەسىلى. ايتۋ كەرەك، سالىق بەرەشەگىن «ە-Salyq Azamat» موبيلدىك قوسىمشاسى، ەكىنشى دەڭگەيدەگى بانكتەردىڭ قوسىمشالارى، مەملەكەتتىك كىرىستەر كوميتەتىنىڭ www.kgd.gov.kz ينتەرنەت-رەسۋرسىندا نەمەسە 1414/3 ءبىرىڭعاي بايلانىس ورتالىعى ارقىلى تەكسەرىپ، تولەۋگە بولادى»، - دەلىنەدى حابارلامادا.
الماتى قالاسى بويىنشا مەملەكەتتىك كىرىستەر دەپارتامەنتى اۆتوكولىك يەلەرىن قولايسىز جاعداي مەن سوت ورىنداۋشىلارى جانە ايىپپۇل تۇراعىنىڭ قىزمەتىنە شىعىندانباس ءۇشىن سالىق بەرەشەكتەرىن ۋاقىتىلى وتەۋگە شاقىردى.