ق ر پرەزيدەنتى قاسىم-جومارت توقايەۆتىڭ قحر-عا مەملەكەتتىك ساپارى بارىسىندا سيان قالاسىنداعى قازاق-قىتاي ينۆەستيسيالىق دوڭگەلەك ۇستەلى كەزىندە Orbis Manufacturing كومپانياسى (Orbis Kazakhstan ەنشىلەس كاسىپورنى) مەن EXEED International كومپانياسى اراسىندا ليسەنزيالىق كەلىسىمگە قول قويىلدى.
كەلىسىم Orbis Manufacturing كومپانياسىنا قازاقستان رەسپۋبليكاسىندا قىتايلىق EXEED پرەميالدى برەندىندەگى اۆتوكولىكتەردى شىعارۋ قۇقىعىن قاراستىرادى، دەپ حابارلايدى Almaty-akshamy.kz.
«Orbis Kazakhstan» كومپانيالار توبىنىڭ ديرەكتورلار كەڭەسىنىڭ ءتوراعاسى فاررۋح ماحمۋدوۆ پەن EXEED International باس ديرەكتورى چين چاو تەحنولوگيالار تۋرالى كەلىسىمگە قول قويدى.
الماتىنىڭ يندۋستريالدى ايماعىندا جاڭا زاۋىت كەشەنى سالىنادى. وندىرىستىك قۋاتى جىلىنا 80 مىڭ كولىك شىعاراتىن كاسىپورىننىڭ قۇرىلىسى 2023 جىلى باستالادى. كاسىپورىن EXEED وزىق تەحنولوگيالارى مەن زاماناۋي تەحنولوگيالىق جابدىقتاردىڭ پايدالانا وتىرىپ، جۇڭگو اۆتوموبيل ونەركاسىبى كوشباسشىلارىنىڭ ستاندارتتارى بويىنشا سالىنادى. جوباعا سالىناتىن ينۆەستيسيالار 72 ملرد تەڭگەنى قۇرايدى. ءبىرىنشى كەزەڭدە زاۋىت كەشەنى حالىقتى 1500 جاڭا جۇمىس ورنىمەن قامتاماسسىز ەتۋگە مۇمكىندىك بەرەدى.
Orbis Kazakhstan ديرەكتورلار كەڭەسىنىڭ ءتوراعاسى فاررۋح ماحمۋدوۆتىڭ مالىمدەۋىنشە، بۇل كەلىسىم Orbis Kazakhstan كومپانيالار توبىنىڭ دامۋىنداعى ماڭىزدى كەزەڭ بولدى.
«ءبىز ءۇشىن بۇل كومپانيا قىزمەتىنىڭ جاڭا كەزەڭى، سونىمەن قاتار EXEED International كومپانياسىمەن ۇزاق مەرزىمدى جانە ءوزارا ءتيىمدى ىنتىماقتاستىققا دايىن ەكەنىمىزدىڭ كورسەتكىشى. ەلدەگى تارتىمدى ينۆەستيسيالىق بيزنەس-كليمات، سونداي-اق جەرگىلىكتى وندىرىستەرگە مەملەكەتتىك قولداۋ كورسەتۋ جانە سالاداعى مەملەكەتتىك ساياساتتىڭ تۇراقتىلىعى ءبىز ءۇشىن ماڭىزدى فاكتور ەكەنىن اتاپ وتەمىن. ءبىز قىتايدىڭ اۆتوكولىك ونەركاسىبى كوشباسشىلارىنىڭ ستاندارتتارى بويىنشا جوعارى تەحنولوگيالىق وندىرىسكە ينۆەستيسيا جاسايمىز. ول زاماناۋي تەحنولوگيالار ترانسفەرتىنە، سالىق تولەمدەرىنىڭ وسۋىنە، سونداي-اق جالاقىسى جوعارى جۇمىس ورىندارىن قۇرۋعا ىقپال ەتەدى. ءبىزدىڭ جوبا قازاقستان مەن جۇڭگو اراسىنداعى ەكونوميكالىق بايلانىستى نىعايتۋعا، سونداي-اق قازاقستاننىڭ اۆتوموبيل ونەركاسىبىن دامىتۋعا سەپتىگىن تيگىزەتىنىنە سەنىمدىمىز»، - دەدى ف.ماحمۋدوۆ.
ءبىرىنشى كەزەڭدە قازاقستاندىق كاسىپورىن EXEED ماركالى اۆتوكولىكتەردىڭ ءۇش ۇلگىسىن شىعارادى، كەيىننەن برەندتىڭ ۇلگىلەر جەلىسىن كەڭەيتەدى. اتاپ ايتقاندا، تولىق گاباريتتى VX جول تالعامايتىن كولىگىنىڭ، TXL ورتا ولشەمدى كروسسوۆەرىنىڭ جانە LX ىقشام كروسسوۆەرىنىڭ شاناعىن دانەكەرلەۋ جانە بوياۋمەن بىرگە تولىق سيكلدى ءوندىرىس (CKD) ىسكە قوسىلادى.
قازىرگى تاڭدا Orbis Kazakhstan-نىڭ ەنشىلەس كاسىپورنى، Orbis Auto اۆتوكولىك توبى قازاقستاندا EXEED ديلەرلىك جەلىسىن دامىتۋدا. بۇل جەلى ارقىلى شىعارىلعان كولىكتەردى ساتۋ جولعا قويىلادى. 2025 جىلى جاڭا كاسىپورىننىڭ كونۆەيەرىنەن قازاقستاندا جاسالعان تۇڭعىش EXEED اۆتوكولىگى شىعارىلاتىنى ايتىلدى.