الماتىدا اۋلا اۋماعىن ۇزدىك كوگالداندىرۋعا بايقاۋ جاريالاندى

جەڭىمپاز 5 ملن تەڭگە الادى.

قالا كۇنى قارساڭىندا اۋلا اۋماعىن ۇزدىك كوگالداندىرۋ بايقاۋىنىڭ باستالعانى تۋرالى ايتىلدى، دەپ حابارلايدى Almaty-akshamy.kz. بۇل تۋرالى الماتى قالاسىنىڭ اكىمى باقىتجان ساعىنتايەۆ ءوزىنىڭ Twitter-دەگى پاراقشاسىندا جازدى.

«قالا كۇنى قارساڭىندا اۋلا اۋماعىن ۇزدىك كوگالداندىرۋ بايقاۋىنىڭ باستالعانى تۋرالى حابارلاندى. تۇرعىن ءۇي يەلەرى بىرلەستىكتەرىنىڭ وكىلدەرى، سونداي-اق قالا تۇرعىندارى ecovid.kz سايتىندا ءوتىنىم بەرە الادى. جەڭىمپاز 5 ملن تەڭگە الادى»، - دەدى باقىتجان ساعىنتايەۆ.

الماتىدا قالا كۇنىنە وراي «اۋلا اۋماعىن ۇزدىك كوگالداندىرۋ - 2021» بايقاۋى جاريالاندى. جەڭىمپازعا اۋلانى كوگالداندىرۋعا قاجەتتى قۇرال-سايمان، وسىمدىكتەر ساتىپ الۋعا 5 000 000 تەڭگە كولەمىندە سەرتيفيكات تابىستالادى. 

بايقاۋ اۋلالاردى اباتتاندىرۋ جانە كوگالداندىرۋعا،  تۇرعىنداردىڭ الەۋمەتتىك بەلسەندىلىگىن باعالاۋ ءۇشىن جانە ەكولوگيالىق احۋالدى جاقسارتۋ ءۇشىن ۇيىمداستىرىلىپ وتىر. 

بايقاۋعا تۇرعىندار، مەنشىك يەسى ۇيىمدارى مەن پاتەر يەلەرى كووپەراتيۆتەرى قاتىسا الادى. ءىس-شارا اۋلانى كوگالداندىرۋ جانە اباتتاندىرۋ جۇمىستارىنا قالا تۇرعىندارىنىڭ نازارىن اۋدارۋ ماقساتىندا ۇيىمداستىرىلعان. سونىمەن قاتار، ۇيىمداستىرۋشىلاردىڭ ايتۋىنشا، قالانىڭ جاسىل جەلەگىنە كوڭىل ءبولۋ ماسەلەلەرىنە دە ءمان بەرىلۋدە.  

جۇمىستاردى باعالاۋ كەزىندە ولاردىڭ مادەني-ەستەتيكالىق، تاجىريبەلىك، جاڭاشىلدىق ەرەكشەلىكتەرىنە نازار اۋدارىلادى. بايقاۋعا قاتىسۋ ءۇشىن www.ecovid.kz سايتىندا تىركەۋدەن ءوتىپ، ءوتىنىش قالدىرۋ قاجەت. ماراپاتتاۋ سالتاناتى قالا كۇنى — 19 قىركۇيەك كۇنى وتەدى.