بيىل كەڭەس اسكەرلەرى شەكتەۋلى كونتينگەنتىنىڭ اۋعانستان جەرىنەن شىعارىلعانىنا 35 جىل تولىپ وتىر. وسىعان وراي اتاۋلى كۇن قارساڭىندا قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەيەۆ اۋعان سوعىسىنىڭ ارداگەرلەرىن قابىلدادى.
ولاردىڭ ىشىندە اۋعان جەرىندە اسا ماڭىزدى 9 جاۋىنگەرلىك وپەراسياعا قاتىسقان، جەكە قۇرامىن سوعىس ءىس-قيمىلدارىنان ەش شىعىنسىز الىپ شىققان جانە تاۋەكەلشىل ارەكەتتەرى ءۇشىن «قىزىل جۇلدىز» وردەنىمەن ماراپاتتالعان، ءىىم جانە ۇلتتىق ۇلاننىڭ قۇرمەتتى ارداگەرى وتستاۆكاداعى پولكوۆنيك گەنناديي فالەيەۆ، گەرات پروۆينسياسىنداعى قارۋلى كوتەرىلىستى باسۋ كەزىندە بارلاۋ مالىمەتتەرىن جيناۋ بويىنشا جاۋىنگەرلىك مىندەتتەردى اتقارعان، «جاۋىنگەرلىك ەڭبەگى ءۇشىن» مەدالىنىڭ يەگەرى وتستاۆكاداعى اعا لەيتەنانت ەگىزباي بايتۇرسىنوۆ، اۋعان جەرىندە ءبىر جارىم جىلعا جۋىق قىزمەت ەتىپ، ەرلىك ۇلگىلەرىن كورسەتكەن، جەكە قۇرام ىشىندە ەرەكشە ابىرويعا يە بولعان، «اۋعان حالقىنىڭ ينتەرناسيوناليست جاۋىنگەرگە العىسى» مەدالىمەن ماراپاتتالعان، ءىىم جانە ۇلتتىق ۇلاننىڭ قۇرمەتتى ارداگەرى، كۇرەڭ بەرەت يەسى وتستاۆكاداعى مايور پاۆەل سەمەنيۋك، ءتۇرلى جاۋىنگەرلىك ءىس-قيمىلداردى ساپالى بايلانىسپەن قامتاماسىز ەتكەن، اۋعانستاننىڭ قاتەرلى جولىمەن 18 رەت اۆتوموبيل لەگىن الىپ جۇرگەن جاۋجۇرەك جاۋىنگەر «جاۋىنگەرلىك ەڭبەگى ءۇشىن»، «اۋعان حالقىنىڭ ينتەرناسيوناليست جاۋىنگەرگە العىسى» مەدالدارىنىڭ يەگەرلەرى وتستاۆكاداعى مايور ۆيكتور لينوك جانە كابۋل قالاسىنداعى كەڭەس اسكەرلەرى قاتارىندا ءبىر جىل ءۇش اي قىزمەت اتقارعان، «جاۋىنگەرلىك ەڭبەگى ءۇشىن» مەدالىنىڭ يەگەرى زاپاستاعى مەديسينا قىزمەتىنىڭ پولكوۆنيگى قالىبەك بۇرالحييەۆ بار.
قولباسشى ارداگەر جاۋىنگەرلەردى جىلى قابىلداپ، اتاۋلى كۇنمەن قۇتتىقتادى. ولاردىڭ جەكە قۇرامدى تاربيەلەۋ ىسىنە قوسار ۇلەستەرىنىڭ زور ەكەندىگىنە باسا نازار اۋدارىپ، الداعى ۋاقىتتا دا بىرلەسىپ قىزمەت ەتە بەرەتىندىكتەرىنە تىلەك ءبىلدىردى. ارداگەرلەرىمىزگە ەستەلىك سىيلىقتار ۇسىنىلدى.
ايتا كەتەيىك، اۋعان سوعىسىنا كسرو ەلدەرىمەن قاتار قازاقستاننان 22 مىڭ ادام قاتىسىپ، ولاردىڭ 761 قازا تاپقان، 21 حابارسىز كەتكەن.