12 جەلتوقسان كۇنى ساعات 20:30-دا الماتى قالاسىنىڭ ورتالىق ستاديونىندا ۋەفا كونفەرەنسيا ليگاسى اياسىندا «استانا» مەن «چەلسي» كوماندالارىنىڭ فۋتبول ماچى وتەدى، دەپ حابارلايدى aqshamnews.kz.
بيلەتتەر تۋرالى اقپارات
بيلەتتەرگە سۇرانىستىڭ جوعارى بولۋىنا جانە الاياقتاردىڭ جالعان بيلەتتەر ساتۋىنىڭ الدىن الۋ ماقساتىندا الماتىنىڭ سپورت باسقارماسى جانكۇيەرلەرگە Zakazbiletov.kz سەرۆيسى ارقىلى بيلەتتەردى الدىن الا ساتىپ الۋدى ۇسىنادى. دەلدالداردىڭ قىزمەتىنە جۇگىنبەۋىڭىزدى وتىنەمىز. سپەكۋلياسيا مەن قايتا ساتۋدىڭ الدىن الۋ ءۇشىن ساتىپ الىنعان بيلەتتەر جەكە ءاتى-جونى كورسەتىلگەن تۇردە راسىمدەلەدى جانە ماچ كۇنى ەلەكتروندىق پوشتاعا جىبەرىلەدى. ستاديون كاسسالارىنان بيلەتتەردى ساتىپ الۋ مۇمكىندىگى بولمايدى. ستاديونعا كىرەبەرىستە جانكۇيەرلەردەن بيلەت پەن بيلەتتەگى ءاتى-جوننىڭ سايكەستىگى تەكسەرىلەدى. بۇدان كەيىن جەكە تەكسەرۋ جۇرگىزىلىپ، بيلەتتىڭ شىنايىلىعىن تەكسەرۋ ءۇشىن شتريح-كود سكانەرلەنەدى.
جولداردىڭ جابىلۋى تۋرالى اقپارات
كىرۋ كەزىندە كەپتەلىس بولماس ءۇشىن جانكۇيەرلەرگە ورتالىق ستاديونعا ەرتەرەك كەلىپ، قوعامدىق كولىكتەردءى پايدالانۋعا كەڭەس بەرىلەدى.
فۋتبول جانكۇيەرلەرىنە ستاديوننىڭ ەسىگى 18:00-دە اشىلادى.
كولىك كەپتەلىسىن بولدىرماۋ ماقساتىندا ستاديونعا جاقىن اۋماقتاردا 12 جەلتوقسان كۇنى ساعات 18:30-دان 00:00-گە دەيىن اباي داڭعىلىنىڭ (بايتۇرسىنوۆ كوشەسىنەن مۇقانوۆ كوشەسىنە دەيىن) قوزعالىسى شەكتەلەدى، ساتبايەۆ كوشەسى (بايتۇرسىنوۆ كوشەسىنەن بايزاقوۆ كوشەسىنە دەيىن) تولىق جابىلادى. جاقىن ماڭداعى كوشەلەردە پاترۋلدىك پوليسيا بەكەتتەرى قويىلادى.
جانكۇيەرلەرگە ارنالعان اقپارات
12 جەلتوقسان كۇنى قالادا مينۋس تەمپەراتۋرا بولادى دەپ كۇتىلۋدە، سىناپ باعاناسى شامامەن -11 گرادۋس. سوندىقتان جىلى ءارى ىڭعايلى كيىم كيۋ كەرەك. قاۋىپسىزدىك شارالارىنا بايلانىستى ستاديون اۋماعىنا تەرموس الىپ كىرۋگە تىيىم سالىنادى. جانكۇيەرلەر ءۇشىن ستاديون ىشىندە ىستىق سۋسىندار مەن جەڭىل تاعامدار ساتىپ الۋعا بولاتىن ساۋدا نۇكتەلەرى جۇمىس ىستەيدى. ستاديون اينالاسىندا 60 بيودارەتحانا، ونىڭ ىشىندە مۇمكىندىگى شەكتەۋلى جاندارعا ارنالعان دارەتحانالار ورناتىلادى.
ترانسفەر تۋرالى اقپارات
قالا اكىمدىگى جانكۇيەرلەردىڭ ورتالىق ستاديونعا جانە كەرى قايتۋىنا قولايلى بولۋ ءۇشىن 8 تەگىن اۆتوبۋس مارشرۋتىن ۇيىمداستىرادى. ءار مارشرۋتقا 10 اۆتوبۋستان بولىنەدى. جينالۋ نۇكتەلەرىن 2GIS سەرۆيسى ارقىلى كورۋگە بولادى:
• قالقامان شاعىن اۋدانى (№7 قالالىق اۋرۋحانا ايالداماسى) – ورتالىق ستاديون.
• وربيتا شاعىن اۋدانى (مۇستافين-تورايعىروۆ كوشەلەرىنىڭ قيىلىسى) – ورتالىق ستاديون.
• اينابۇلاق شاعىن اۋدانى (ماقاتايەۆ-پاۆلودار كوشەلەرىنىڭ قيىلىسى) – ورتالىق ستاديون.
• «حالىق ارەنا» ايالداماسى (سولتۇستىك باعىت) – ورتالىق ستاديون.
• الماتى-1 تەمىرجول ۆوكزالى ايالداماسى – ورتالىق ستاديون.
• «رايىمبەك باتىر» مەتروپوليتەن بەكەتى – ورتالىق ستاديون.
• ناۋرىزباي اۋدانىنىڭ حقكو ايالداماسى – ورتالىق ستاديون.
• مومىشۇلى-موڭكە بي كوشەلەرىنىڭ قيىلىسى ايالداماسى – ورتالىق ستاديون.
اۆتوبۋستار ساعات 16:00-دەن باستاپ جۇرە باستايدى جانە تولۋىنا قاراي جولعا شىعادى.
جەكە كولىك يەلەرى مەن قالا تۇرعىندارىنان ۋاقىتشا قولايسىزدىققا تۇسىنىستىكپەن قاراپ، باعىتىن الدىن الا جوسپارلاۋدى سۇرايمىز.