الماتىدا اسكەري قىزمەتشىنىڭ اتىن جامىلعان الاياق ىزدەستىرىلۋدە

كۇدىكتىگە قاتىستى ءقازىردىڭ وزىندە 10 ارىز-شاعىم تۇسكەن.

الماتى پوليسياسى ناۋرىزباي اۋداندىق پوليسيا باسقارماسىنىڭ باستاماسىمەن اسكەري قىزمەتشىلەردىڭ اتىن جامىلىپ الاياقتىق قىلمىس جاساپ جۇرگەن ادام تۋرالى ەسكەرتەدى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«ءبىزدىڭ جەدەل قىزمەت بولىمدەرىنىڭ قىزمەتكەرلەرىنىڭ زەردەلەۋىنە سايكەس سوڭعى ۋاقىتتا ءتۇرلى تۇرمىستىق زاتتاردىڭ ساتىلۋى جايلى جارناما بەرىپ جۇرگەن اسكەري فورماداعى ازاماتقا الدانىپ قالعاندار سانى ارتىپ كەلەدى. بارلىق جاعدايدا الاياق ءوزىنىڭ قىزمەت بابىمەن باسقا قالاعا اۋىسىپ جاتقاندىعىن جەلەۋ ەتىپ، تۇرمىستىق تەحنيكامەن ءۇي زاتتارىن ساۋدالاپ، ولاردان تاۋار اقشاسىن تولىق اۋدارۋدى سۇراعان. ساتىپ الۋشىلار كۇدىگىن تۋدىرماس ءۇشىن ول ءوزىنىڭ اسكەري فورماداعى كيىمىمەن تۇسكەن سۋرەتىن، قۇجاتتارىن جىبەرگەن. تەك قانا الماتى قالاسىنىڭ وزىندە كۇدىكتىگە قاتىستى 10 ارىز-شاعىم تىركەلىپ وتىر»، – دەدى الماتى قالاسى ناۋرىزباي اۋداندىق پوليسيا باسقارماسىنىڭ باستىعى دانيار مەڭدەبايەۆ.

وسى ورايدا الماتى پوليسياسى ازاماتتاردىڭ وتە ساق بولۋلارىن سۇرايدى. ەگەر كەز كەلگەن تاۋار ساتىپ الۋ بارىسىندا ۆولوحوۆ الەكساندر ۆيكتوروۆيچ ەسىمدى اسكەري فورماداعى ادامعا تاپ بولساڭىز، دەرەۋ پوليسياعا حابارلاسىڭىز.