الماتىدا اسكەري عىلىمدى دامىتۋ ماسەلەلەرى تالقىلاندى

قۇرلىق اسكەرلەرىنىڭ اسكەري ينستيتۋتىندا ساعادات نۇرماعامبەتوۆتىڭ 100 جىلدىعىنا ارنالعان III حالىقارالىق عىلىمي-پراكتيكالىق كونفەرەنسيا ءوتتى. 

ازەربايجان، ارمەنيا، بەلارۋس، قىرعىزستان، تاجىكستان جانە وزبەكستان اسكەري وقۋ ورىندارىنىڭ وكىلدەرىنە بەينەكونفەرەنسيا ۇيىمداستىرىلدى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ. 

كونفەرەنسياعا «قازاقستان ارداگەرلەرى» اۋعان سوعىسى ارداگەرلەرى قاۋىمداستىعىنىڭ ءتوراعاسى باقىتبەك سماعۇل، حالىق قاھارمانىنىڭ نەمەرەسى ايجان نۇرماعامبەتوۆا، ەلىمىزدىڭ كۇش قۇرىلىمدارى وقۋ ورىندارىنىڭ كۋرسانتتارى، جوو-نىڭ ستۋدەنتتەرى، ماگيسترانتتارى مەن دوكتورانتتارى، باۋىرجان مومىش ۇلى اتىنداعى «جاس ۇلان» رەسپۋبليكالىق مەكتەبىنىڭ تاربيەلەنۋشىلەرى قاتىستى. 

كونفەرەنسيا جۇمىسى ەكى سەكسيا بويىنشا ۇيىمداستىرىلدى. وندا قازىرگى جاعدايدا اسكەري عىلىمدى دامىتۋ، يدەولوگيالىق جۇمىس، اسكەري وقىتۋ جانە تاربيە سالاسىنداعى عىلىمي قىزمەتتى جەتىلدىرۋ ماسەلەلەرى تالقىلاندى. ۇلتتىق قاۋىپسىزدىك جانە حالىقارالىق اسكەري ىنتىماقتاستىق تاقىرىپتارى دا قوزعالدى. 

ق ر ۇقك اكادەمياسىنىڭ باستىعى ۇلتتىق قاۋىپسىزدىك گەنەرال-مايورى احات مۇقاشيەۆ، قۇرلىق اسكەرلەرى اسكەري ينستيتۋتى باستىعىنىڭ ءبىرىنشى ورىنباسارى پولكوۆنيك جانىبەك سارعازين جانە باسقالار بايانداما جاسادى. 

كونفەرەنسيا قورىتىندىسى بويىنشا اسكەري عىلىمدى ودان ءارى دامىتۋ جونىندە قارار قابىلدانىپ، قاۋىپسىزدىك سالاسىندا ۇسىنىمدار ازىرلەندى. قاتىسۋشىلارعا سەرتيفيكاتتار مەن ەستەلىك سىيلىقتار بەرىلدى.