ق ر قورعانىس مينيسترلىگىنىڭ مالىمەتىنشە، كەڭەس وداعىنىڭ باتىرى گەنەرال-مايور يۆان پانفيلوۆتىڭ نەمەرەسى الۋا بايقاداموۆا باسقاراتىن ۇلتتىق اسكەري-پاتريوتتىق ورتالىق پەن جاۋىنگەرلىك داڭق مۇراجايىنىڭ فيليالى ورنالاسقان ارميا ۇيىندە دە قايتا قالپىنا كەلتىرۋ جۇمىستارى جۇرگىزىلىپ جاتىر. عيماراتتىڭ كونسەرتتىك جانە ءمارمار زالدارى، سونداي-اق جاۋىنگەرلىك داڭق مۇراجايى كۇردەلى جوندەۋدەن وتۋدە. وندا وفيسەرلەر كلۋبى مەن بالالارعا ارنالعان اسكەري-پاتريوتتىق فيلمدەر تۇسىرەتىن كينوپاۆيلون اشىلادى.
«الماتى ءۇشىن ارميا ءۇيىنىڭ مادەني ماڭىزى زور. بۇل – تاريحي ساۋلەت ەسكەرتكىشى. سوندىقتان ءبىز ونىڭ باستاپقى كەلبەتىن قالامىز بەن ەلىمىزدىڭ ەڭ كورىكتى جەرلەرىنىڭ ءبىرى رەتىندە ساقتاۋعا مىندەتتىمىز»، - دەپ اتاپ ءوتتى رۋسلان جاقسىلىقوۆ گارنيزونعا ساپارى بارىسىندا.
عيماراتتى قايتا قالپىنا كەلتىرۋدەگى باستى ەرەكشەلىكتەردىڭ ءبىرى اشىق اسپان استىنداعى جاۋىنگەرلىك تەحنيكا مۇراجايىن اشۋ بولماق. مۇراجاي ەكسپوزيسياسىن ۇلى وتان سوعىسى جىلدارىنداعى قارۋ-جاراقتىڭ 30-عا جۋىق ۇلگىسى قۇرايدى. ەڭ قۇندى ەكسپوناتتاردىڭ قاتارىندا 1931 جىلعى 152 مم گاۋبيسا بار.
«جاۋىنگەرلىك تەحنيكا مۇراجايىنىڭ ارميا ءۇيى ءۇشىن ماڭىزى زور بولماق. ول قالداياقوۆ كوشەسىنىڭ وڭ جاعىندا ورنالاسادى. ال سول جاعىندا اكىمدىك كۇشىمەن الماتىلىقتار مەن قالا قوناقتارىنىڭ دەمالۋىنا ارنالعان گۇلزار سالىناتىن بولادى. ءبىز بۇل نىسانداردىڭ بارلىعى جەڭىستىڭ 80 جىلدىعىنا وراي اشىلاتىنىن ماقتان تۇتامىز»، - دەدى الۋا بايقاداموۆا.
سونىمەن قاتار قالداياقوۆ كوشەسىندە جاستاردىڭ پاتريوتتىق تاربيەسىندەگى زاماناۋي تاسىلدەردى بەينەلەيتىن جاڭا بارەلەف ورناتىلدى.