الماتىدا ارىق جەلىلەرىنىڭ جاعدايىن زەرتتەۋ ءۇشىن روبوت قولدانىلادى

اپپاراتتى جەرگىلىكتى ماماندار ءوز كۇشتەرىمەن جيناپ شىعارعان.

قۇبىرجولداردى زەرتتەۋ ءۇشىن ەكولوگيا جانە قورشاعان ورتا باسقارماسىنىڭ ماماندارى جوعارى ايقىندىقتاعى كامەرامەن جابدىقتالعان جانە تومەنگى جيىلىكتە جۇمىس جاسايتىن، قاشىقتان باسقارىلاتىن روبوتتى پايدالانا باستادى، دەپ حابارلايدى Almaty-akshamy.kz

دوڭگەلەكتىڭ كومەگىمەن جىلجيتىن كىشىگىرىم روبوت قولجەتىمسىز جەرلەردەن وڭاي ءوتىپ، سول جەردەگى بەينەنى تىكەلەي ارنايى مونيتورعا شىعارادى. سونىمەن قاتار اپپارات تەلەمەتريا مالىمەتتەرىن ءيىلۋ بۇرىشى مەن تىك كۇيىندە دە كورسەتەدى. قۇرىلعىنىڭ كومەگىمەن لاستانۋ دەڭگەيىمەن قاتار قۇبىرداعى كورروزيا، جارىلۋ جانە ت.ب. اقاۋلارىن انىقتاۋعا بولادى.

قازىرگى كەزدە قالا اكىمدىگى ارىق جەلىسىن قالپىنا كەلتىرىپ، ولاردى كوللەكتورلارمەن بايلانىستىرۋ جۇمىستارىن جۇرگىزىپ جاتىر. سونىمەن قاتار ارىق جەلىلەرىنىڭ سۋارۋ مۇمكىندىگىن دە قالپىنا كەلتىرۋ قولعا الىنعان. ارىق جەلىلەرىن جوندەۋ جانە قايتا قۇرۋ جۇمىستارى بويىنشا ءتيىستى جوبالاۋ ەسەپتەۋ قۇجاتتاماسى ازىرلەندى. كەيبىر جەرلەردە ارىق جەلىلەرىن كەڭەيتۋ جوسپارلانعان.

قالادا تىعىز قۇرىلىستىڭ جۇرگىزىلۋىنە بايلانىستى ارىق جەلىسىن سالۋعا مۇمكىندىك جوق جەرلەردە سۋ باسۋدى بولدىرماۋ ءۇشىن سۋ اعىنىن ءبولۋ جۇمىستارى جۇرگىزىلۋدە. جىلدىڭ سوڭىنا دەيىن 56 سۋ باسۋ اۋماعىندا كوللەكتور جۇيەسىن ىسكە قوسىپ، ارىق جەلىسىمەن بايلانىستىرىپ، اپاتتى قالپىنا كەلتىرۋ جۇمىستارىن جۇرگىزۋ جوسپارلانعان.

الماتىدا سۋ باسۋدىڭ نەگىزگى سەبەبى ارىق جەلىسىندە جاۋىن جانە ەرىگەن قار سۋىن وتكىزۋ مۇمكىندىكتىڭ جوقتىعىندا جانە كوللەكتور-كارىز جۇيەسىنىڭ ناشار بولۋىندا. قولدانىستاعى كوللەكتورلارعا كوپ جىلدان بەرى ءتيىستى قىزمەت كورسەتىلمەگەن.

قالادا بارلىعى 16 كوللەكتور بار، ونىڭ 12ء-ى  جارامسىز، تورتەۋى تەك 30%-عا جۇمىس ىستەپ تۇر. بيىل جالپى ۇزىندىعى 376 كم ارىق جەلىسىن سالۋ جانە قايتا قۇرۋ جۇمىستارى باستالدى.