اپتاپ ىستىق القىمنان الا ءتۇستى.
ورتا ەسەپپەن السعاندا، ءبىر الماتىنىڭ وزىندە دارىگەرلەرگە حابارلاساتىنداردىڭ سانى 200 ادامعا ارتقان، دەپ حابارلايدى Almaty-akshamy.kz.
Almaty.tv ارناسى تاراتقان اقپاراتقا جۇگىنسەك، قالىپتى كۇندەردە جەدەل جاردەم پۋلتىنە 1800-گە تارتا قوڭىراۋ تۇسەدى ەكەن. بۇل – ءبىر كۇندىك كورسەتكىش. ءقازىر كومەك سۇراپ حابارلاساتىندار، ورتا ەسەپپەن الساق، 2000-عا جەتىپتى.
ارينە، مۇنىڭ ءبارى ىستىقتان زارداپ كورىپ جاتقاندار ەمەس. دەگەنمەن "تىمىرسىق اۋادا تىنىسى تارىلىپ، ەسىنەن تاناتىندار كوپ" دەيدى دارىگەر. ال كۇننىڭ ىستىعى جۇرەك-قان تامىر جۇيەسىندە اقاۋى بارلار ءۇشىن تىپتەن ءقاۋىپتى.
«كۇننىڭ ىستىعى قۇلاقتاعى دىبىسقا اسەر ەتىپ، بەتتىڭ قىزارۋى، ەسىنەن تانىپ قالۋ، قۇسۋعا دەيىن الىپ بارادى. سوعان بايلانىستى، شاقىرتۋ وتە كوپ. الدىڭعى كۇندەرى 10-12 شاقىرتۋ بولسا، ءقازىر 200-گە دەيىن بارادى. ءبىر كۇندە ءبىر بريگادانىڭ وزىندە 20 شاقىرتۋ كەلىپ جاتىر»، – دەدى جەدەل جاردەم ستانساسىنىڭ دارىگەرى اقجان بادايەۆ.
جەدەل جاردەمنىڭ كومەگىنە جۇگىنەتىندەردىڭ كوبى – ورتا جاستان اسقان ازاماتتار. كۇن ساۋلەسى وتكەنىنىڭ العاشقى بەلگىسى رەتىندە دارىگەرلەر شارشاۋ مەن باستىڭ اينالۋىن اتاپ كورسەتەدى. جۇرەك اينىعان جاعدايدا دا ءقاۋىپتىڭ بارىن ەسكەرگەن ءجون.
ەسكەرەر ءبىر جايت بار: كۇن وتكەنىنىڭ سيمپتومدارى كەيدە ينسۋلت پەن اللەرگيانىڭ بەلگىلەرىنە ۇقساۋى مۇمكىن. سوندىقتان السىزدىك بولسا، ءۇي جاعدايىندا ەم قابىلداپ، ءوز بەتىنشە دياگنوز قويۋعا بولمايدى.
"كوشەدە، كۇن استىندا ۇزاق جۇرۋگە بولمايدى. كۇن ساۋلەسى تىكە تۇسسە، كورۋ قابىلەتىنىڭ بۇزىلۋ ءقاۋپى بار. سوندىقتان كوزىلدىرىك، باس كيىم سىندى قاراپايىم قورعانىس قۇرالدارىن تاستاماعان ءجون. ءبىز اپتاپ ىستىقتا اپپاق كيىم كيۋ كەرەك ەكەنىن ءجيى ايتامىز. ونىڭ ۇستىنە سۋدى كوبىرەك ىشكەن ابزال. ال جۇرەك جۇمىسىندا اقاۋى بار ادامداردىڭ مۇلدەم سىرتقا شىقپاعانى دۇرىس"، – دەيدى جەدەل جاردەم ستانساسى ءبولىمىنىڭ اعا دارىگەرى ايگۇل ەرمانوۆا.
سينوپتيكتەر "الماتىداعى اپتاپ ىستىق 41 گرادۋسقا دەيىن بارادى" دەيدى. الداعى اپتادا بايقالاتىن مۇنداي اۋا رايى ەلدىڭ باسىم بولىگىندە ساقتالماق. سوندىقتان قاراپايىم ەرەجەنىڭ ءومىر قاۋىپسىزدىگىنە اسەر ەتەتىنىن ۇمىتپاعان ءجون.